21.10.2026 | 23:30
Էրդողանն ու Ալիևը հեռախոսազրույց են ունեցել՝ Բաքվի կողմից Անկարայի նկատմամբ կոշտ քայլերի ֆոնին
Զելենսկին Ֆեդորովին առաջարկել է ռազմական նորարարությունների գծով փոխվարչապետի պաշտոնը
Քաղաքականություն
23.07.2026 | 18:51
Ուկրաինայի նախագահ Վլադիմիր Զելենսկին պաշտպանության նախկին նախարար Միխայիլ Ֆեդորովին առաջարկել է ռազմական նորարարությունների գծով փոխվարչապետի պաշտոնը։ Ուկրաինայի նախագահն այս մասին հայտարարել է Իռլանդիայի վարչապետ Միխոլ Մարտինի հետ մամուլի ասուլիսում, գրում է BBC-ի ռուսական ծառայությունը։
«Ես նրան մի քանի պաշտոն եմ առաջարկել, որպեսզի չխորանամ մեր բոլոր հանդիպումների մանրամասների մեջ։ Վերջին պաշտոնը Ուկրաինայի փոխվարչապետի պաշտոնն է՝ ռազմական նորարարությունների գծով։ Սա շատ կարևոր է, քանի որ նորարարությունները պետք է համակարգվեն Պաշտպանության նախարարության ղեկավարության, բանակի գլխավոր հրամանատարի և նախագահի հետ։ Այս ամենը կարելի է և պետք է արվի ամեն օր»,- ասել է Զելենսկին։
Ուկրաինական լրատվամիջոցներն ավելի վաղ հաղորդել էին, որ Ֆեդորովը, որի հրաժարականը բողոքի ցույցեր էր առաջացրել ամբողջ երկրում, հրաժարվում է պաշտպանության նախարարից բացի՝ որևէ այլ պաշտոն ստանձնել, քանի որ չի հասկանում իր հրաժարականի պատճառները։
Զելենսկին պաշտպանության նախարարի պաշտոնակատար է նշանակել Ուկրաինայի անվտանգության ծառայության նախկին ղեկավար Եվգենի Խմարային։ Նա նաև պաշտոնից ազատել է Ուկրաինայի զինված ուժերի գլխավոր հրամանատար Ալեքսանդր Սիրսկիին և նրա փոխարեն նշանակել Միխայիլ Դրապատիին։
Սիրսկիի հրաժարականի մասին հայտարարելիս Զելենսկին ասել էր, որ Ֆեդորովին առաջարկել է «կառավարությունում արժանի պաշտոն, որը թույլ կտա միավորել պետության տեխնոլոգիական բաղադրիչը»։
Թարգմանությունը՝ Էմմա Չոբանյանի
