Քաղաքականություն
03.12.2018 | 13:34
Դեկտեմբերի 1-ին և 2-ին ֆրանսիական ոստիկանությունը անկարգությունների 378 մասնակցի է ձերբակալել: Ակցիաների պատճառը վառելիքի գները բարձրացնելու՝ իշխանությունների որոշումն է: Ձերբակալվածներից շուրջ 200-ը դատարանի առաջ կկանգնեն:
Ֆրանսիայի արդարադատության նախարարությունում նշել են, որ քրեական հանցագործություններին պատասխանը բավական կոշտ է լինելու. ակցիաների կազմակերպիչներից ոմանք կարող են մինչև 7 տարվա ազատազրկման դատապարտվել:
Փարիզի ոստիկանության ղեկավար Միշել Դելպյուեշն ասել է, որ անկարգություններն աննախադեպ մակարդակի են հասել: Դրանց մասնակիցները մայրաքաղաքում 6 շենք և ավելի քան 100 ավտոմեքենա են հրկիզել, ոստիկանության հետ բախումներ են գրանցվել:
«Ինտերֆաքս»-ի փոխանցմամբ՝ արդեն մի քանի շաբաթ Ֆրանսիայում շարունակվող բողոքի ակցիաներին անցած հանգստյան օրերին տասնյակ հազարավոր մարդիկ են մասնակցել: Վերջինները նշում են, որ ապստամբել են իշխանությունների հակաժողովրդական քաղաքականության դեմ:
