Սև ծովում թուրքական նավը ենթարկվել է ԱԹՍ-ի հարձակման․ զոհ և վիրավորներ կան

Սև ծովում թուրքական դրոշի ներքո նավարկող նավի վրա անօդաչու թռչող սարքի հարձակման հետևանքով անձնակազմի մեկ անդամ զոհվել է, ևս երեքը՝ վիրավորվել, գրում են թուրքական լրատվամիջոցները։

Նշվում է, որ MV Reyhan Sarı նավն ածուխ էր տեղափոխում Ազովի ծովում գտնվող Ռուսաստանի Թաման նավահանգստից դեպի Թուրքիայի հյուսիսային Տրապիզոն նահանգ, երբ հարձակման է ենթարկվել թուրքական Սամսունի ափերի մոտ գտնվող միջազգային ջրերում: Նավը հարձակումից հետո վերսկսել է նավարկությունը, իսկ անձնակազմի վիրավոր անդամները տեղափոխվել են ափ: Թուրքական իշխանությունները պաշտոնական հայտարարություն չեն արել միջադեպի վերաբերյալ, որը, ենթադրաբար, իրականացվել է ուկրաինական անօդաչու թռչող սարքի միջոցով:

Ռուս-ուկրաինական պատերազմը վտանգել է Սև ծովի ջրային անվտանգությունը: Աճող սպառնալիքներին ի պատասխան՝ Թուրքիան, Ռումինիան և Բուլղարիան ստեղծել են ծովային անվտանգության նախաձեռնություն, որի հիմնական խնդիրը Սև ծովում թափառող ծովային ականների մաքրումն է:

Ուկրաինայի ռազմածովային ուժերը կիրակի հայտարարել էին, որ թուրքական սեփականության տակ գտնվող հացահատիկ տեղափոխող բեռնանավին ռուսական հրթիռային հարվածների հետևանքով զոհվել է նավի վրա գտնվող հինգ մարդ, անձնակազմի հինգ անդամ էլ անհետ կորել է:

Ըստ ուկրաինական ռազմածովային ուժերի՝ Ռուսաստանը երեք թևավոր հրթիռ է արձակել Գվինեա-Բիսաուի դրոշի ներքո նավարկող Golden Leo նավի ուղղությամբ, երբ այն «հացահատիկի բեռով լքում էր մարտական ​​գոտին»:

Թուրքիայի արտգործնախարար Հաքան Ֆիդանն այս հարցը բարձրացրել էր Կիև կատարած այցի ժամանակ։

«Սև ծովում նավարկության և առևտրային անվտանգությունը կենսական նշանակություն ունի։ Ես սա քննարկել եմ ինչպես ռուսական կողմի հետ Մոսկվա կատարած իմ այցի ժամանակ, այնպես էլ իմ հարգարժան գործընկերոջ հետ այստեղ։ Սա կարևոր հարց է մեզ համար և բոլոր սևծովյան երկրների համար»,- ասել էր Ֆիդանը Ուկրաինայի արտաքին գործերի նախարար Անդրեյ Սիբիհայի հետ համատեղ մամուլի ասուլիսում։

Թարգմանությունը՝ Էմմա Չոբանյանի