21.10.2026 | 23:30
Էրդողանն ու Ալիևը հեռախոսազրույց են ունեցել՝ Բաքվի կողմից Անկարայի նկատմամբ կոշտ քայլերի ֆոնին
Սաուդյան Արաբիայում միջուկային էներգետիկան զարգացնելու՝ ԱՄՆ-ի մտադրությունը մտահոգություններ է առաջացրել
Քաղաքականություն
23.07.2026 | 20:25
ԱՄՆ-ը մտադիր է աջակցել Սաուդյան Արաբիային իր խաղաղ միջուկային էներգիայի ծրագրի մշակման գործում: Համապատասխան երկարաժամկետ համաձայնագիրը Վաշինգտոնում ստորագրել են երկրների էներգետիկայի նախարարներ Քրիս Ռայթը և Աբդուլազիզ բին Սալման Ալ Սաուդը, հայտարարել է ԱՄՆ Էներգետիկայի նախարարությունը, գրում է DW-ի ռուսական ծառայությունը։
Համաձայնությունների շրջանակում՝ ամերիկյան ընկերությունները կկարողանան մասնակցել Սաուդյան Արաբիայի միջուկային ծրագրի մշակմանը, «որն օգուտ կբերի ամերիկյան արդյունաբերությանը, աշխատողներին և մատակարարման շղթաներին, ինչպես նաև կօգնի բավարարել Սաուդյան Արաբիայի էներգետիկ կարիքները», նշվում է մամուլի հաղորդագրության մեջ։
Ավելին, փաստաթղթի համաձայն՝ կողմերը ստորագրել են ուղեկցող երկկողմանի երաշխիքների մասին համաձայնագիր։
Քրիս Ռայթը վստահեցրել է, որ «այս համաձայնագրերը համապատասխանում են միջուկային անվտանգության և չտարածման ամենաբարձր չափանիշներին և հիմնված են աշխարհի լավագույն միջուկային տեխնոլոգիաների վրա»: Նշվում է, որ ԱՄՆ-ի և Սաուդյան Արաբիայի միջև Մերձավոր Արևելքի թագավորության խաղաղ միջուկային ծրագիրը Վաշինգտոնի օգնությամբ զարգացնելու համաձայնագիրն այժմ կներկայացվի Կոնգրեսի քննարկմանը:
Ըստ Reuters-ի՝ Կոնգրեսի անդամները կարող են հրաժարվել հաստատել փաստաթուղթը։ Դա պայմանավորված է այն հանգամանքով, որ Կոնգրեսի շատ անդամներ դեմ են միջուկային տեխնոլոգիաների փոխանցմանը քաղաքականապես անկայուն Մերձավոր Արևելքի երկրներ, հատկապես, Իրանի դեմ ԱՄՆ-Իսրայել պատերազմի ժամանակ։
«Բացի այդ՝ սկզբում պարզ չէր, թե միջազգային տեսուչները որքանով մուտք կունենան ապագա օբյեկտներ՝ ապահովելու համար, որ միջուկային տեխնոլոգիաները չօգտագործվեն ռազմական նպատակներով»,- նշում է Reuters-ը։
The Wall Street Journal-ը նախկինում հայտնել էր, որ գործարքը միլիարդավոր դոլարներ կարժենա։ Այն, ինչպես կանխատեսվում է, կգործի 30 տարի և թույլ կտա ամերիկյան ընկերություններին կարևոր դեր խաղալ Սաուդյան Արաբիայի միջուկային ենթակառուցվածքների ստեղծման գործում՝ միաժամանակ արգելելով օտարերկրյա մրցակիցներին մուտք գործել նախագծեր։
Եթե այս քայլը հաստատվի համատեղ ուսումնասիրության արդյունքների հիման վրա, ենթադրվում է, որ Սաուդյան Արաբիայում կկառուցվի ուրանի հարստացման օբյեկտ։
