Եմենի հութիները պնդում են, որ Կարմիր ծովում հարձակվել են Սաուդյան Արաբիայի երկու լցանավերի վրա

Եմենի հութիները պնդում են, որ հինգշաբթի առավոտյան Կարմիր ծովում հարվածել են երկու սաուդյան նավթայի լցանավերի։ Հայտարարության մեջ զինյալները նշել են, որ թիրախավորվել են «Layla» (IMO 9336098) և «Encelia» (9240172) նավերը։ Երկուսն էլ նավարկում են Սաուդյան Արաբիայի դրոշի ներքո։

Հութիների խոսնակը հայտարարել է, որ նավերը «խախտել են Կարմիր ծովում շրջափակումը» և պնդել, որ նրանք հարձակվել են երկու նավերի վրա բազմաթիվ անօդաչու թռչող սարքերով և հրթիռներով։

Սաուդյան Արաբիայի պետական լրատվական գործակալությունը, հղում անելով Գլխավոր տրանսպորտային վարչության անանուն պաշտոնյային, հաղորդել է, որ «Encelia» նավը «թիրախում է հայտնվել Կարմիր ծովում նավարկելիս», ինչի հետևանքով «հրդեհ է բռնկվել նավի վրա»։

«Անձնակազմի բոլոր անդամներն անվտանգ են»,- ասվում է հաղորդագրության մեջ։

Սաուդյան Արաբիան չի մեկնաբանել «Layla»-ի վրա հարձակումը։

Մեծ Բրիտանիայի ծովային առևտրի գործողությունների վարչությունը (UKMTO) հաղորդել է «անհայտ արկի» հարվածի դեպքի մասին, երբ լցանավն անցնում էր Կարմիր ծովով, Սաուդյան Արաբիայի Ալ Շուքայք քաղաքից շուրջ 70 ծովային մղոն հարավ-արևմուտք։ Արկը հրդեհ է առաջացրել, սակայն զոհերի կամ շրջակա միջավայրի վրա ազդեցության մասին հաղորդագրություններ չկան, հայտնել է UKMTO-ն։ Իշխանությունները հետաքննում են դեպքը։

Երկուշաբթի հութիները հայտարարել էին Կարմիր ծովով նավարկող սաուդյան նավերի ծովային շրջափակման մասին։

Թարգմանությունը՝ Էմմա Չոբանյանի