ԱՄՆ-ն 11-րդ գիշերն անընդմեջ հարվածել է Իրանին․ Թեհրանը թիրախավորել է ամերիկյան ռազմաբազաները

ԱՄՆ զինված ուժերն ավարտել են Իրանի դեմ 11-րդ գիշերն անընդմեջ իրականացված հարվածները։ Այս մասին ասվում է ԱՄՆ Կենտրոնական հրամանատարության հայտարարությունում, գրում է CNN-ը։

«CENTCOM-ի ուժերը թիրախավորել են Իրանի ռազմական գործողությունների համակարգման կենտրոնները, ծովային կարողությունները, ինքնաթիռների անգարները, անօդաչու թռչող սարքերի պահեստավորման վայրերը և ռազմական լոգիստիկ ենթակառուցվածքները՝ Հորմուզի նեղուցում առևտրային նավագնացությանը սպառնալու՝ Իրանի կարողությունը հետագայում թուլացնելու համար»,- ասվում է  X-ում հրապարակված գրառման մեջ։

CENTCOM-ը լրացուցիչ մանրամասներ չի տրամադրել թիրախների թվի վերաբերյալ։ Հայտարարության մեջ նշվում է, որ Իրանը վերջին երեք ամիսների ընթացքում հարձակվել է նեղուցով անցնող ավելի քան 30 առևտրային նավերի վրա, իսկ մայիսի սկզբից ի վեր CENTCOM-ն «օգնել է հեշտացնել մոտ 900 առևտրային նավերի և 450 միլիոն բարել հում նավթի տարանցումը»։

CNN-ի կողմից տեղորոշված տեսանյութում երևում են կրակ և ծխի ամպեր, որոնք բարձրանում են Իրանի Բեհբահանի օդանավակայանի մոտ, այն բանից հետո, երբ պետական ​​լրատվամիջոցները հաղորդել են, որ քաղաքը ենթարկվել է ԱՄՆ հարձակման։ Տեսանյութում երևում են Բեհբահանի օդանավակայանի մոտակայքում այրվող շենքերը, որոնք գտնվում են Խուզեստան նահանգի կենտրոնական մասում։ Իրանական լրատվամիջոցները հաղորդել են լույս չորեքշաբթի գիշերը երկրի արևմուտքում և հարավում գտնվող մի շարք վայրերում հարվածների մասին։

Հակաօդային պաշտպանությունն ակտիվացվել է մայրաքաղաք Թեհրանում, չնայած վնասների մասին անմիջապես հաղորդագրություններ չեն եղել։ Ավիահարվածներ են հասցվել Իրանի մայրաքաղաքից մոտ 150 մղոն արևմուտք գտնվող Կաբուդարահանգ քաղաքի վրա, հաղորդում է IRIB պետական ​​հեռարձակողը։

IRIB-ը հայտնել է նաև Իրանի հյուսիս-արևմուտքում գտնվող Թավրիզ քաղաքին, արևմտյան Իլամ նահանգի Չավար և Աբդանան քաղաքներին հարվածների մասին։ Պայթյուններ են լսվել նաև Հորմուզի նեղուցի մոտ գտնվող Մահշահր և Սիրիկ քաղաքներում, ինչպես նաև Պարսից ծոցի Բուշեր քաղաքում։ Հարավ-արևմուտքում գտնվող Քոնարաք և Չաբահար նավահանգստային քաղաքները նույնպես ենթարկվել են հարձակման։

Հաղորդվում է, որ հուլիսի 21-ին Իրանը հրթիռային և անօդաչու թռչող սարքերով հարվածներ է հասցրել Քուվեյթի Camp Arifjan ռազմաբազային, որտեղ տեղակայված են ամերիկյան ուժերը։ Քուվեյթի իշխանությունները հայտարարել են, որ  հակաօդային պաշտպանությունը որսացել է հրթիռներն ու անօդաչու սարքերը։

Իսլամական հեղափոխության պահապանների կորպուսը (ԻՀՊԿ) հայտարարել է Nasr 2 գործողության «վեցերորդ ալիքի» և Քուվեյթում ու Բահրեյնում ամերիկյան ռազմական օբյեկտների վրա հարձակումների մասին։

Իրանը հայտարարել է, որ անօդաչու թռչող սարքերով հարձակման նոր ալիք է սկսել՝ ուղղված Հորդանանի Ալ-Ազրաք ամերիկյան բազայի և Բահրեյնի Շեյխ Իսա ամերիկյան բազայի ամերիկյան օբյեկտների դեմ։ IRIB-ը հաղորդել է, որ գործողությունը սկսվել է չորեքշաբթի առավոտյան, թիրախավորվել են երկու բազաներում գտնվող ամերիկյան ռազմական ենթակառուցվածքները։

Թարգմանությունը՝ Էմմա Չոբանյանի