Մերցն ու Ալիևը ռազմավարական գործընկերության վերաբերյալ հռչակագիր են ստորագրել

Բեռլինում Գերմանիայի կանցլեր Ֆրիդրիխ Մերցի ու Ադրբեջանի նախագահ Իլհամ Ալիևի բանակցություններին հաջորդել է  փաստաթղթերի ստորագրման արարողությունը։ Ադրբեջանական լրատվամիջոցների հաղորդմամբ՝ նրանք ստորագրել են համատեղ հռչակագիր՝ Ադրբեջանի Հանրապետության և Գերմանիայի Դաշնային Հանրապետության միջև երկկողմ գործընկերության ռազմավարական օրակարգի վերաբերյալ։

Միջոցառման ընթացքում ստորագրվել է նաև համատեղ հռչակագիր՝ Ադրբեջան-Գերմանիա գործարար խորհրդի ստեղծման և գործունեության վերաբերյալ։

Ադրբեջանի և Գերմանիայի միջև այսօր ստորագրված փաստաթղթերը երկու երկրների միջև հարաբերությունները կբարձրացնեն նոր մակարդակի, հայտարարել է Ալիևը Մերցի հետ համատեղ ասուլիսում։

«Մենք այսօր արդեն հասել ենք ռազմավարական երկխոսություն։ Մեր երկկողմ օրակարգը բավականին լայն է։ Գերմանիան, որպես Եվրամիության առաջատար երկիր, ընդլայնում է իր ազդեցությունը Հարավային Կովկասում»,- հայտարարել է Ալիևը։

Նա նաև նշել է, որ այս տարվանից սկսել են գազ մատակարարել Գերմանիային։

«Այս ծավալը, անշուշտ, կարող է մեծանալ։ Հիմնական խնդիրներից մեկը ֆինանսավորումն է։ Եվրոպական բանկերը դադարեցրել են նավթի և գազի նախագծերին ֆինանսական աջակցություն ցուցաբերել կանաչ օրակարգի պատճառով։ Նպատակային կլիներ, որ եվրոպական բանկերը վերանայեին իրենց որոշումները»,- հայտարարել է Ալիևը՝ նշելով, թե Ադրբեջանն ի վիճակի է անհրաժեշտ ծավալի նավթ մատակարարել։

Թարգմանությունը՝ Էմմա Չոբանյանի