21.07.2026 | 23:30
Էլեկտրամատակարարման ընդհատումներ՝ Երևանում ու մարզերում
ԱՄՆ դաշնային դատարանը կասեցրել է Paramount-ի և Warner Bros.-ի միաձուլման գործընթացը
Քաղաքականություն
21.07.2026 | 23:02
Ամերիկյան Օքլենդի (Կալիֆորնիա) շրջանային դատարանի դատավոր Արասելի Մարտինես-Օլգինը երկու շաբաթով կասեցրել է Paramount-ի կողմից Warner Bros.-ի ձեռքբերման գործընթացը։ Գործարքի արժեքը գնահատվում է 110 միլիարդ դոլար, գրում է Meduza-ն։
Կասեցումը կարող է երկարաձգվել ևս երկու շաբաթով: Հաջորդ դատական նիստը նշանակված է օգոստոսի 3-ին: Դատավորն այս որոշումը կայացրել է՝ ի պատասխան դեմոկրատների կողմից վերահսկվող ԱՄՆ 12 նահանգների գլխավոր դատախազների ներկայացրած հայցի։ Նրանք պահանջել են արգելափակել Paramount-ի և Warner Bros.-ի միաձուլումը։
Paramount Skydance-ը 2026 թվականի սկզբին համաձայնել էր ձեռք բերել Warner Bros. Discovery մեդիա հոլդինգը՝ գերազանցելով Netflix հոսքային ծառայության առաջարկը։
Paramount-ը և Warner Bros.-ը Միացյալ Նահանգների հինգ խոշորագույն կինոդիստրիբյուտորների և մալուխային հեռուստատեսության սեփականատերերի շարքում են։ Գործարքը կմիավորի երկու խոշորագույն կինոստուդիաներն ու բովանդակության պահոցները, ինչպես նաև Paramount+ և HBO Max հոսքային հարթակները։
Միավորված ընկերությունը կվերահսկի ֆիլմերի վարձույթի և մալուխային հեռուստատեության ծրագրերի շուկայի գրեթե մեկ երրորդը։ Սա կարող է վնասել կինոթատրոններին, մալուխային հեռուստատեսության օպերատորներին և հեռուստադիտողներին, պնդում են հայցվորները։
Paramount Skydance-ը կառավարում է Դեյվիդ Էլիսոնը՝ Oracle-ի հիմնադիր, միլիարդատեր Լարի Էլիսոնի որդին: ԱՄՆ նախագահ Դոնալդ Թրամփը հրապարակավ աջակցել է Paramount-ին Warner Bros.-ի հետ բանակցություններում՝ հայտարարելով, որ Էլիսոններն «իր ընկերներն են»:
Թարգմանությունը՝ Էմմա Չոբանյանի
