Անկարան բանակցություններ է վարում երրորդ երկրների հետ՝ C-400-ի վերաբերյալ․ Թուրքիայի պաշտպանության նախարար

Անկարան բանակցություններ է վարում երրորդ երկրների հետ իր զինանոցում առկա ռուսական C-400 հրթիռային պաշտպանության համակարգերի ապագայի վերաբերյալ։ Այս մասին հայտարարել է Թուրքիայի պաշտպանության նախարար Յաշար Գյուլերը։

Պատասխանելով պատգամավորների գրավոր հարցերին, որոնք վերաբերել են Ռուսաստանից C-400 համակարգի գնումից հետո Թուրքիային F-35 կործանիչների ծրագրից բացառելուն և հետագայում ԱՄՆ-ի հետ այս հարցի շուրջ շփումների վերսկսմանը, Գյուլերը նշել է. «ԱՄՆ-ի հետ ռազմական և քաղաքական ոլորտներում դրական թափով շարունակվող գործընթացում լուծումներ են որոնվում փոխըմբռնման և համագործակցության միջոցով անցյալից մնացած, ինչպես նաև երրորդ երկրներին վերաբերող հարցերի շուրջ: Ինչպես միշտ՝ մեր ազգային պաշտպանության ծրագրերը կազմվում են ճշգրիտ և գրագետ՝ հաշվի առնելով ներկա և ապագա սպառնալիքների վերլուծությունները»:

Գրավոր հարցերը հնչում են C-400 համակարգի երրորդ երկրին վաճառքի վերաբերյալ խորհրդարանական քննարկումների ֆոնին՝ որպես Թուրքիայի կողմից F-35 կործանիչներ գնելու խոչընդոտը վերացնելու միջոց։

Գյուլերը նաև ընդգծել է, որ ազգային պաշտպանության պլանավորումն իրականացվում է ճշգրիտ և գրագետ՝ հաշվի առնելով ներկա և ապագա սպառնալիքների վերլուծությունները։

Թուրքիայի ՊՆ-ն հուլիսի 16-ին հայտարարել էր, որ C-400 համակարգերի հետ կապված աշխատանքները շարունակվում են «բազմաթիվ ճակատներում»։

«C-400 հեռահար տարածաշրջանային օդային և հրթիռային պաշտպանության համակարգերի հետ կապված աշխատանքները շարունակվում են բազմաթիվ ճակատներում։ Հստակ զարգացումների մասին հանրությանը կտեղեկացվի, երբ դրանք տեղի ունենան»,- լրագրողներին ասել է թուրք պաշտոնյան։

Ռուսաստանը կապի մեջ է Թուրքիայի հետ Անկարային նախկինում մատակարարված C-400 հակաօդային պաշտպանության համակարգերի վերաբերյալ, հայտարարել էր Կրեմլի խոսնակ Դմիտրի Պեսկովը՝ թեման որակելով «խիստ զգայուն»։

Թարգմանությունը՝ Էմմա Չոբանյանի