04.09.2026 | 17:54
«Տիգրան Մեծ» բնակելի շենքի կառուցապատողը տուգանվել է 15.2 մլն դրամով և պարտավորվել փոխհատուցել բնակիչներին
2018-ին ՀՀ-ում ՄԻԱՎ-ի 361 դեպք է գրանցվել․ այսօր ՄԻԱՎ/ՁԻԱՀ-ի դեմ պայքարի միջազգային օրն է
Հասարակություն
01.12.2018 | 18:00
Դեկտեմբերի 1-ը ՄԻԱՎ/ՁԻԱՀ-ի դեմ պայքարի միջազգային օրն է: Օրվա նպատակը պետությունների ուշադրությունն այս կարևոր խնդրի վրա հրավիրելն ու պետական, հասարակական, միջազգային ու բարեգործական կազմակերպությունների միավորված ջանքերի միջոցով ՄԻԱՎ/ՁԻԱՀ համաճարակի դեմ պայքարելն է: Օրն առաջին անգամ նշվել է 1988-ի դեկտեմբերի 1-ին:
2018 թվականի ՄԻԱՎ/ՁԻԱՀ-ի դեմ պայքարի օրվա խորագիրն է՝ «Խնայել կյանքեր առաջնորդության և գործընկերության միջոցով»:
Հայաստանի Հանրապետությունում ՄԻԱՎ-ով վարակվածության առաջին դեպքը գրանցվել է 1988 թվականից։ Նույն տարում էլ մեկնարկել է վարակվածության դեպքերի արձանագրումը։
1988թ. մինչև 2018թ հոկտեմբերի 31-ը Հայաստանի Հանրապետությունում գրանցվել է ՄԻԱՎ վարակի 3269 դեպք ՀՀ քաղաքացիների շրջանում, որոնցից 361-ը` 2018թ. ընթացքում:
ՄԻԱՎ վարակի արձանագրված դեպքերի ընդհանուր կառուցվածքում գերակշռում են արական սեռի ներկայացուցիչները՝ 2266 մարդ (69%), իգական սեռի ներկայացուցիչների մոտ արձանագրվել է վարակի 1003 դեպք (31%): ՄԻԱՎ վարակի 57 դեպք (1,7%) է արձանագրվել երեխաների մոտ:
2011 թվականից Հայաստանում գործում է հակառետրովիրուսային բուժումը, որն իրականացվում է միջազգային դրամաշնորհային ծրագրերի՝ մասնավորապես Գլոբալ Ֆոնդի կողմից։ Ֆինանսավորման արդյունքում Հայաստանի բոլոր ՄԻԱՎ/ՁԻԱՀ ունեցողներին անվճար դեղորայք է տրվում։ 2018-ին հիմնադրամի կողմից դեղերի տրամադրումն ավարտվում է, սակայն Հայաստանը կարող է ստացվող ֆինանսավորումը երկարացնել ևս երեք տարով:
Այդուհանդերձ, 2021 թվականից այդ բուժօգնությունը այլևս հասանելի չի լինի և ծախսերի հոգումը կանցնի պետությանը։
Հավելենք, որ 2005 թվականից ՀՀ առողջապահության նախարարության ՁԻԱՀ-ի կանխարգելման հանրապետական կենտրոնում (ՁԻԱՀ ԿՀԿ) ՄԻԱՎ/ՁԻԱՀ-ով հիվանդներին տրամադրվում է անվճար, անանուն հետազոտություն և հակառետրովիրուսային բուժում, որը հասանելի է հիվանդներին, որոնք ունեն բուժման ցուցում և տվել են իրենց համաձայնությունը:
Նելլի Մելքոնյան
