05.11.2026 | 10:48
Վենսը հայտարարել է, որ Իրանի հետ պատերազմը հանրապետականների պարտության պատճառն է ընտրություններում
Ադրբեջանում այս տարի զոհված զինծառայողների թիվը հասել է 33-ի
Քաղաքականություն
20.07.2026 | 22:36
Անցյալ շաբաթ Ադրբեջանում ևս երկու զինծառայողի մահվան մասին հաղորդումներ են եղել։ Սակայն պաշտոնական գերատեսչությունները որևէ մեկնաբանություն չեն տվել այդ միջադեպերի վերաբերյալ, գրում են ադրբեջանական լրատվամիջոցները։
Հուլիսի 15-ին հայտարարվել է, որ զոհվել է Պետական սահմանապահ ծառայության զինծառայող, ավագ սերժանտ Ֆարիդ Աղամալիևը։ Հուլիսի 18-ին միջադեպի մասին տեղեկություններ և լուսանկարներ տարածվել են սոցիալական ցանցերում։
Պետական անվտանգության ծառայությունը զինծառայողի մահվան վերաբերյալ որևէ հայտարարություն չի արել: Տեղեկատվությունը հրապարակած մի շարք իշխանամետ լրատվամիջոցներ ավելի ուշ ջնջել են լուրը։
Հուլիսի 17-ին էլ հաղորդվել է, որ Պաշտպանության նախարարության զորամասերից մեկում ծառայող Ալեքբար Գուլիևը մահացել է պարաշյուտի չբացվելու հետևանքով՝ վարժանքների ժամանակ։ Դեպքի մասին տեղեկություններ, լուսանկարներ և տեսանյութեր հրապարակվել են սոցիալական ցանցերում։ Ադրբեջանի ՊՆ-ն զինծառայողի մահվան վերաբերյալ պաշտոնական հայտարարություն չի արել։ Սակայն կառավարամետ լրատվամիջոցներում տեղեկատվություն է տարածվել, որ տեսանյութը, որը, ենթադրաբար, արտացոլում է միջադեպի պահը, կեղծ է։
«Տեսանյութում ցուցադրված ռազմական տրանսպորտային ինքնաթիռը C-130 տուրբոպրոպելյար ինքնաթիռ է։ Ադրբեջանի պաշտպանության նախարարությունը չունի այս տեսակի ռազմական տրանսպորտային ինքնաթիռ։ Բացի այդ, տեսանյութում երևացող պարաշյուտային համակարգը չի պատկանում ադրբեջանական բանակի սպառազինության մեջ օգտագործվող պարաշյուտների տեսակներին։ Հետևաբար, այն պնդումները, թե տեսանյութը պատկանում է ադրբեջանական բանակին, չեն համապատասխանում իրականությանը»,- ասվում է հայտարարության մեջ։
Այնուամենայնիվ, չի բացահայտվել, թե որ պետական մարմինն է հերքել տեղեկատվությունը։
Կասպիական ռազմական հետազոտությունների ինստիտուտի տվյալների համաձայն՝ Ադրբեջանի անվտանգության և պաշտպանության ոլորտում մահացությունների թիվը, 2026 թվականի հուլիսի 20-ի դրությամբ, հասել է 33-ի։ Բոլորը ոչ մարտական զոհեր են։
2026 թվականին 9 մարդ մահացել է տարբեր հիվանդություններից, 7-ը՝ ավտովթարներից, 7-ը՝ վթարներից, 4-ը՝ ինքնասպանությունից և 1-ը՝ անզգուշությունից։ 5 մարդու մահվան պատճառը չի հայտարարվել։
Մահացածներից 21-ը Պաշտպանության նախարարության աշխատակիցներ են եղել, ութը՝ Պետական սահմանապահ ծառայության, մեկը՝ Ներքին զորքերի, մեկը՝ նախագահական անվտանգության ծառայության, մեկը՝ Արտակարգ իրավիճակների նախարարության և մեկը՝ Զորահավաքի և զորակոչի պետական ծառայության աշխատակից։
Թարգմանությունը՝ Էմմա Չոբանյանի
