ԵՄ-ն Կիևին ռուսական հարվածների պատճառով նոր պատժամիջոցներ է ՌԴ ԱԹՍ-ներ արտադրողների նկատմամբ

Հաշվի առնելով Ռուսաստանի կողմից Ուկրաինայի դեմ շարունակվող և սրվող ագրեսիան, այդ թվում՝ այս տարվա հուլիսի 1-ի և 5-ի գիշերը Կիևի վրա զանգվածային հարվածները, ինչպես նաև քաղաքացիական ենթակառուցվածքներին ուղղված ռազմական արշավը, ԵՄ խորհուրդը հուլիսի 17-ին որոշել է սահմանափակող միջոցներ կիրառել մեկ անձի և հինգ կազմակերպության նկատմամբ։ Բոլորն էլ կապված են Ռուսաստանի ռազմարդյունաբերական համալիրի հետ, մասնավորապես, զբաղվում են անօդաչու թռչող սարքերի արտադրությամբ, ասվում է հաղորդագրության մեջ, գրում է DW-ի ռուսական ծառայությունը։

Բոլոր հինգ կազմակերպությունները ABS Electro ընկերությունների խմբի մաս են կազմում, որը մշակում և արտադրում է անօդաչու թռչող սարքերով պատերազմի համար անհրաժեշտ էլեկտրոնային և ռադիոէլեկտրոնային բաղադրիչներ։

Մասնավորապես, այս ընկերությունները զբաղվում են «Շահեդ» և «Գերան» անօդաչուների հնարավորությունները բարելավող համակարգերի մշակմամբ, այդ թվում՝ ռադիոէլեկտրոնային պայքարի միջոցների դիմադրողականության բարձրացմամբ։ Ավելին, խմբի մի քանի ընկերություններ արտադրում են ավտոմատ կառավարման համակարգեր Ռուսաստանի էներգետիկ ոլորտի համար, որը մնում է ռուսական պետության համար եկամտի զգալի աղբյուր։

ABS Electro ընկերությունների խմբի տնօրենների խորհրդի նախագահ և մի քանի անդամ ընկերությունների ղեկավար Իրինա Խարիսովան նույնպես պատժամիջոցների տակ է։

Նոր սահմանափակումները ԵՄ պատժամիջոցների ռեժիմի մաս են կազմում, որը թիրախավորում է այն անհատներին և կազմակերպություններին, որոնց գործողությունները խաթարում կամ սպառնում են Ուկրաինայի տարածքային ամբողջականությանը, ինքնիշխանությանը և անկախությանը։ Պատժամիջոցների ցանկում ընդգրկված անձանց նկատմամբ գործում է  ակտիվների սառեցումը։ Նրանց ուղղակի կամ անուղղակի ֆինանսական կամ տնտեսական միջոցներ տրամադրելը նույնպես արգելված է։ Անհատներին նաև արգելվում է մուտք գործել Եվրամիություն։ Համապատասխան իրավական ակտերը հրապարակվում են Եվրամիության պաշտոնական տեղեկագրում։