16.07.2026 | 13:46
5 մլրդ դրամի պարգևավճար․ ինչպես է բաժանվել գումարը գերատեսչությունների միջև
Հարուցվել է քրեական գործ՝ 36-ամյա տղամարդու դանակահարության դեպքի առթիվ. մեկ անձի մեղադրանք է առաջադրվել
Հասարակություն
30.11.2018 | 20:28
ՀՀ ՔԿ ԵՔՔՎ Շենգավիթ վարչական շրջանի քննչական բաժնում քննություն է տարվում՝ պարզելու 36-ամյա տղամարդու դանակահարության հանգամանքները:
2018թ. նոյեմբերի 27-ին՝ ժամը 10:30-ին, բժշկական կենտրոնից ոստիկանությունում ահազանգ է ստացվել առ այն, որ իրենց մոտ բուժօգնության է տեղափոխվել 1982թ. ծնված տղամարդ՝ «նեֆրեկտոմիայի, լյարդի պատռվածքի հեմոստազի, պոստհեմոռագիկ անեմիայի ձևով ծանր, կյանքին վտանգ սպառնացող» վնասվածքներով:
Դեպքի առթիվ ՀՀ ՔԿ ԵՔՔՎ Շենգավիթ վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով:
Իրականացված անհետաձգելի քննչական և օպերատիվ-հետախուզական միջոցառումների արդյունքում պարզվել են դեպքի մի շարք հանգամանքներ՝ դեպքի վայրը, շարժառիթը, տվյալներ են ձեռք բերվել ենթադրյալ հանցագործություն կատարած անձի ինքնության վերաբերյալ, ով հանդիսանում է Արարատի մարզի բնակիչ՝ ծնված 1957 թվականին:
Քրեական գործով ձեռնարկվել են անհրաժեշտ քննչական և դատավարական այլ գործողություններ՝ հարցաքննվել են վկաներ, կատարվել է անձին լուսանկարով ճանաչման ներկայացնելու քննչական գործողություն, նշանակվել են դատաբժշկական, դատահետքաբանական և դատակենսաբանական փորձաքննություններ:
Նախնական քննությամբ փաստական տվյալներ են ձեռք բերվել, որ 2018թ. նոյեմբերի 27-ին՝ ժամը 10:00-ից 10:30-նն ընկած ժամանակահատվածում, կենցաղային հարցերի շուրջ Արարատի մարզի բնակչի և ՓԲԸ ընկերության աշխատակցի միջև վիճաբանություն է տեղի ունեցել ՓԲԸ-ին պատկանող տարածքում, հնչել են սեռական բնույթի հայհոյանքներ: Վիճաբանությանը միջամտել է 1982թ. ծնված տղամարդը՝ փորձելով հանդարտեցնել վիճաբանող կողմերին: Սակայն Արարատի մարզի բնակիչը վիճաբանության է բռնվել նաև նրա հետ, որի ժամանակ էլ իր մոտ գտնվող դանակով հարվածել է 36-ամյա տղամարդու ձախ գոտկային շրջանին և դիմել փախուստի:
2018թ. նոյեմբերի 28-ին Արարատի մարզի 61-ամյա բնակիչը ներկայացել է վարույթն իրականացնող մարմնին և ցուցմունք տվել դեպքի շուրջ: Նույն օրը նա ձերբակալվել է՝ դիտավորությամբ առողջությանը ծանր վնաս պատճառելու կասկածանքով:
Ձեռք բերված բավարար ապացույցների հիման վրա 2018թ. նոյեմբերի 29-ին նրան մեղադրանք է առաջադրվել՝ ՀՀ քրեական օրենսգրքի 112-րդ հոդվածի 1-ին մասով:
Քննիչը միջնորդություն է ներակայացրել դատարան՝ նրա նկատմամբ որպես խափանման միջոց կալանավորումն ընտրելու վերաբերյալ:
Ձեռնարկվում են անհրաժեշտ քննչական և դատավարական այլ գործողություններ՝ ցուցմունքներում մատնանշված հանգամանքներն ստուգելու, բազմակողմանի, լրիվ և օբյեկտիվ քննությունն ապահովելու ուղղությամբ:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
