Ուկրաինան հայտնել է Սև ծովում ռուսական «ստվերային նավատորմի» երկու լցանավերի հարվածելու մասին

Ուկրաինայի անվտանգության ծառայությունը (ՈւԱԾ) հայտարարել է Սև ծովում երկրի ռազմածովային ուժերի հետ համատեղ Ռուսաստանի «ստվերային նավատորմի» մաս կազմող Louise-1 և Banda լցանավերին հարվածելու մասին: Ըստ որոշ տեղեկությունների՝ հարվածները հասցվել են Mamai ռազմածովային անօդաչու թռչող սարքերի միջոցով, գրում է Current time-ը։

Louise-1 լցանավը Բալթիկ ու Սև ծովերի ռուսական նավահանգիստներից տեղափոխում է ապրանքներ՝ անջատելով տրանսպոնդերները: Միայն 2026 թվականին այս նավը տեղափոխել է շուրջ 3 միլիոն տոննա ռուսական Urals տեսակի հում նավթ: Banda-ն ռուսական հում նավթ է տեղափոխել Ուստ-Լուգայի, Կերչի, Նովոռոսիյսկի և Նախոդկայի նավահանգիստներից՝ ըստ Ուկրաինայի անվտանգության ծառայության տվյալների։

«Ստվերային նավատորմի նավերին հարվածը համակարգված կերպով զրկում է Կրեմլին պատերազմի համար անհրաժեշտ միջոցներից։ Այս լցանավերը, չնայած միջազգային պատժամիջոցներին, տեղափոխում են ռուսական նավթ և միլիարդավոր դոլարներով լցնում ագրեսոր պետության գանձարանը։ Հետևաբար, «ստվերային նավատորմի» դեմ ուղղված յուրաքանչյուր հարված ուղղակի հարված է Ռուսաստանի ագրեսիան շարունակելու կարողությանը։ Եվ յուրաքանչյուր նման նավ, որպես Ռուսաստանի ռազմական մեքենայի տարր, օրինական թիրախ է»,- հայտարարել է Ուկրաինայի հատուկ  ծառայությունը։

Սև ու Ազովի ծովերում նավերի վրա հարձակվում են նաև Ուկրաինայի ԶՈՒ Անօդաչու համակարգերի ուժերը։ Հուլիսի 15-ին ԱՄՆ Ռազմածովային ուժերի հրամանատար Ռոբերտ Բրովդին հայտարարել էր Սև ծովում 20 նավերի, այդ թվում՝ 17 լցանավերի հարվածելու մասին: Ազովի ծովում նա պնդում էր, որ «ծովային մարտերի առաջին փուլում» հարված է հասցվել 116 նավի։

Հուլիսի 14-ին Ուկրաինայի Ռազմածովային ուժերը հայտնել էին ԱԴԾ սահմանապահ պարեկային «Իզումրուդ» նավի խորտակման մասին:

Թարգմանությունը՝ Էմմա Չոբանյանի