Ստամբուլում ռուս զբոսաշրջիկների են ձերբակալել մզկիթի վերածված Սուրբ Սոֆիայի տաճարում Աստվածաշունչ կարդալու համար

Ռուսաստանից ամուսնական զույգը «Осторожно, новости»-ին պատմել է, որ թուրքական իշխանությունները ձերբակալել են իրենց Ստամբուլի՝ մզկիթի վերածված Սուրբ Սոֆիայի տաճարում Աստվածաշունչ կարդալու համար, գրում է Meduza-ն:

Ձերբակալվածներն են 35-ամյա Վիկտորիան և 32-ամյա Իգորը, որոնք Թուրքիա են գնացել արձակուրդի։ Հուլիսի 14-ին նրանք գնացել են Ստամբուլի գլխավոր տեսարժան վայրերից մեկը՝ Սուրբ Սոֆիայի տաճար։ Այնտեղ Իգորը հանել է իր հետ բերած Աստվածաշունչը և սկսել կարդալ։ Ամուսինները պատմել են, որ իրենց շրջապատել են և դուրս բերել մզկիթից, իսկ հետո տարել Ֆաթիհ թաղամասի ոստիկանական բաժանմունք։

Ստամբուլի ոստիկանությունը հաստատել է ձերբակալությունը, ՏԱՍՍ-ին հայտնել են աղբյուրները։ Արձանագրության մեջ, ըստ ռուսների, ասվում է, որ նրանք կասկածվում են «բնակչության մեջ ատելություն կամ թշնամանք հրահրելու մեջ»։

Զույգին թույլ չեն տվել վերադառնալ հյուրանոց։ Նրանք, ի վերջո, ուղարկվել են օտարերկրացիների պահման վայր։

«Կնոջս հետ մեզ բաժանել են։ Վաղուց ոչինչ չենք կերել, մեզ շատ վատ ենք զգում»,- պատմել է Իգորը։

Ստամբուլում ՌԴ գլխավոր հյուպատոսությունը զբաղվում է կալանավորված զբոսաշրջիկների հետ կապված իրավիճակով, հայտնել են ՌԴ ԱԳՆ-ից։ Նշվում է, որ դիվանագետները կապի մեջ են ամուսինների փաստաբանի հետ։

Սուրբ Սոֆիայի տաճարը կառուցվել է բյուզանդական կայսր Հուստինիանոս I-ի հրամանով և օծվել 537 թվականին: 1453 թվականին Կոստանդնուպոլսի անկումից հետո եկեղեցին վերածվել է մզկիթի: 1930-ական թվականներին Սուրբ Սոֆիան դարձել էր թանգարան, իսկ 2020 թվականին այն վերականգնվել է որպես մզկիթ: Այնտեղ վերսկսվել են կրոնական ծեսերը։

Թարգմանությունը՝ Էմմա Չոբանյանի