Ֆրանսիան պատմության ամենամեծ շքերթի ընթացքում ցուցադրել է ռազմական հզորությունն ու դաշնակիցների հետ միասնությունը

Ֆրանսիան ցուցադրել է իր ռազմական ուժն ու միասնությունը դաշնակիցների հետ՝ անցկացնելով իր պատմության մեջ ամենամեծ ազգային օրվա շքերթը, որին պատվավոր հյուր էր Ուկրաինայի նախագահը, գրում է AFP-ը։

Հուլիսի 14-ին Էմանուել Մակրոնի նախագահությամբ անցկացված շքերթը միավորել է հազարավոր ֆրանսիացի զինվորների, ինչպես նաև երկու տասնյակ օտարերկրյա պետությունների և կառավարությունների ղեկավարների, այդ թվում՝ Ուկրաինայի նախագահ Վլադիմիր Զելենսկիի, ինչպես նաև հարյուրավոր եվրոպական զինվորների։

Շքերթը, որը նշանավորում է Բաստիլի գրավման օրը Ֆրանսիական հեղափոխության ժամանակ, անցկացվում է Մակրոնի կողմից Ուկրաինայի դաշնակիցների նոր գագաթնաժողովի կազմակերպումից մեկ օր անց՝ հարևան երկրի նկատմամբ Ռուսաստանի լայնածավալ ներխուժումից շուրջ չորսուկես տարի անց։ Շքերթին ներկա եվրոպացի առաջնորդների թվում են եղել Գերմանիայի կանցլեր Ֆրիդրիխ Մերցը և Մեծ Բրիտանիայի վարչապետ Քիր Սթարմերը, որը Մակրոնի հետ միասին գլխավորել է Ուկրաինային աջակցելու եվրոպական ջանքերը։

Շուրջ 6,700 զինվորականներ, 98 ինքնաթիռներ, 31 ուղղաթիռներ, 315 տրանսպորտային միջոցներ և ռեկորդային թվով զինվորականներ են անցել Հաղթական կամարի և Համաձայնության հրապարակի միջև ընկած ավանդական երթուղով։

«Շքերթը պետք է ցույց տար Ֆրանսիայի վերազինումը, Ֆրանսիայի ռազմավարական ինքնավարությունը և Եվրոպայի ռազմավարական զարթոնքը»,- ասել է  Ֆրանսիայի նախագահականի  պաշտոնյան։

«Շքերթն անցնում է մի Եվրոպայում, որը միավորված է և վճռականորեն տրամադրված է աջակցել Ուկրաինային Ռուսաստանի դեմ առ դեմ՝ Եվրոպա, որը վստահ է իր վրա»,- RTL ռադիոյին ասել է պաշտպանության փոխնախարար Ալիս Ռուֆոն։

Տասնյակ հազարավոր քաղաքացիներ, չնայած շոգին, մասնակցել են Փարիզի կենտրոնում անցկացվող տոնակատարություններին՝ ստանալով հատուկ QR կոդեր, որոնք թույլ են տալիս նրանց անցնել անվտանգության պարագիծը։

Երթով անցել են նաև շուրջ 500 զինվորներ, այսպես կոչված, «Կամավորների կոալիցիայից», որը կազմված է հիմնականում եվրոպական երկրներից, որոնք աջակցում են Կիևին Մոսկվայի դեմ։ Խորհրդանշական կերպով, կոալիցիայի անդամների զորքերին հետևել են 25 ուկրաինացի զինվորներ։

«Մեր ուղերձը, որը մենք ուղարկում ենք աշխարհին, հետևյալն է. այո՛, խաղաղությունը մեր նպատակն է։ Այո՛, մենք գնահատում ենք ազատությունն ու օրենքի գերակայությունը։ Եվ այո՛, մենք պատրաստ ենք պայքարել դրանք պաշտպանելու համար։ Միշտ, և արյան գնով, եթե անհրաժեշտ լինի»,- հայտարարել է Էմանուել Մակրոնը։

Եվրոպական անվտանգությանն ուղղված սպառնալիքների աճի և ԱՄՆ նախագահ Դոնալդ Թրամփի՝ անկանխատեսելի դաշնակից համարվելու պայմաններում, Ֆրանսիայի պաշտպանության շտաբի պետ, գեներալ Ֆաբիեն Մանդոնը X-ում գրառմամբ շքերթը որակել է որպես «երկրների միջև ռազմավարական համերաշխության ֆիզիկական մարմնացում»։

Մանդոնն անցյալ տարեվերջին մեծ իրարանցում էր առաջացրել՝ ասելով, որ Ֆրանսիան պետք է պատրաստ լինի «ընդունել իր զավակների կորուստը» Ռուսաստանի հետ ապագա հնարավոր հակամարտության մեջ։

Այս տարվա ռազմական շքերթը Մակրոնի համար վերջինն է՝ որպես նախագահի․ հաջորդ տարի նա հրաժեշտ կտա պաշտոնին։

Թարգմանությունը՝ Էմմա Չոբանյանի