Ուկրաինան և ԵՄ-ն անդամակցության բանակցությունների ևս մեկ կլաստեր են բացել

Հուլիսի 14-ին Ուկրաինան և Եվրամիությունը Բրյուսելում պաշտոնապես բացել են Միությանը Կիևի անդամակցության գործընթացի ևս մեկ բանակցային կլաստեր՝ «Արտաքին հարաբերությունները»։ Այսպիսով, դրա բացումից ի վեր Ուկրաինայի ու ԵՄ-ի միջև արդեն առարկայական բանակցություններ են ընթանում վեց ուղղություններից երկուսում, գրում է DW-ի ռուսական ծառայությունը։

«Այսօր Ուկրաինան ավելի մեծ աշխարհաքաղաքական կշիռ ունի, քան երբևէ»,- ասել է ԵՄ ընդլայնման հարցերով հանձնակատար Մարթա Կոսը՝ ընդգծելով, որ այդ պատճառով է, որ «Արտաքին հարաբերություններ» կլաստերի բացումը հատկապես քաղաքական նշանակություն ունի։

Նրա խոսքով՝ այս կոնկրետ կլաստերի բացումը խորհրդանշական է, քանի որ այն ընդգրկում է արտաքին քաղաքականությունը, անվտանգությունը և պաշտպանությունը․ այն ոլորտները, որոնցում Ուկրաինան արդեն դարձել է Եվրամիության կարևոր գործընկեր։ Կոսն ընդգծել է, որ մնացած չորս բանակցային կլաստերներն արդեն տեխնիկապես պատրաստ են բացման, և Ուկրաինան կատարել է անհրաժեշտ պայմանները։

Այժմ, երբ երկրորդ կլաստերը բացվել է, Ուկրաինան ակնկալում է արագ անցում դեպի մնացյալ բանակցային ոլորտները: Եվրոպական ու եվրաատլանտյան ինտեգրման հարցերով փոխվարչապետ Տարաս Կաչկայի խոսքով՝ Ուկրաինայի և Եվրահանձնաժողովի բոլոր փաստաթղթերն արդեն պատրաստ են, մնացած կլաստերների բացումն այժմ ամբողջությամբ կախված է ԵՄ անդամ 27 պետությունների միջև կոնսենսուսից։

«Մենք գիտենք, որ մնացած բոլոր կլաստերները դրվել են քվեարկության: Ոչ մի անդամ պետություն առարկություններ չունի: Հիմա դա պարզապես արագության հարց է»,- ասել է Կաչկան՝ Բրյուսելում կայացած ճեպազրույցի ժամանակ պատասխանելով DW-ի հարցին։

Նա հավելել է, որ այս հարցը կքննարկվի ԵՄ անդամ պետությունների մշտական ​​ներկայացուցիչների կոմիտեի նիստերում մինչև հուլիսի վերջը:

Իր հերթին, Իռլանդիայի Եվրոպական հարցերի և պաշտպանության նախարար Թոմաս Բիրնը, որի երկիրը ներկայում նախագահում է ԵՄ Խորհրդում, նոր կլաստերի բացումն անվանել է կարևոր ազդանշան ուկրաինացիների համար:

«Խոսքը ոչ միայն Ուկրաինայի ժողովրդի հույսի, այլև Եվրամիությանն անդամակցելու իրական հեռանկարի մասին է»,- հայտարարել է նա:

Բիրնը նաև ընդգծել է, որ Իռլանդիայի նախագահությունը կաշխատի մնացած չորս բանակցային կլաստերները հնարավորինս շուտ բացելու ուղղությամբ։

Առաջին բանակցային կլաստերը՝ «Հիմունքները», բացվել էր հունիսի 15-ին Լյուքսեմբուրգում: Չնայած ԵՄ-ին Ուկրաինայի անդամակցության վերաբերյալ բանակցությունները պաշտոնապես սկսվել են 2024 թվականի հունիսին Լյուքսեմբուրգում, բանակցային կլաստերների բացումը նշանավորում է անցում ԵՄ օրենսդրության որոշակի ոլորտների վերաբերյալ էական բանակցությունների: Այս փուլը մնացել էր արգելափակված մինչև 2026 թվականի հունիսը՝ Հունգարիայի դիրքորոշման պատճառով։

Ուկրաինայի ԵՄ անդամակցության բանակցությունները կառուցված են վեց թեմատիկ կլաստերների վրա, որոնք ընդգրկում են ԵՄ օրենսդրության բոլոր ոլորտները։