Էնդի Բերնեմը՝ Մեծ Բրիտանիայի վարչապետի պաշտոնի հավակնորդ

Լեյբորիստական ​​կուսակցության առաջնորդ և Մեծ Բրիտանիայի վարչապետ Քիր Սթարմերի իրավահաջորդի որոշման  գործընթացում Էնդի Բերնեմն ապահովել է մի շարք այլ լեյբորիստ ​պատգամավորների աջակցությունը՝ այդպիսով ապահովելով կուսակցության ղեկավարության մրցավազքում անվիճելի առաջատարություն: Սթարմերին փոխարինելու միակ թեկնածուն  հուլիսի 13-ի երեկոյան ստացել է Լեյբորիստական ​​կուսակցության 403 պատգամավորներից 349-ի ձայները, գրում է DW-ի ռուսական ծառայությունը:

Արդյունքում, այժմ որևէ այլ թեկնածուի համար անհնար է ապահովել առաջնորդի պաշտոնի համար անհրաժեշտ 81 ձայնը։

Սթարմերին փոխարինելու թեկնածուներ առաջադրելու վերջնաժամկետը լրանում է հուլիսի 16-ին։ Հետևաբար, Բերնեմը պետք է ընտրվի Լեյբորիստական ​​կուսակցության նոր առաջնորդ ուրբաթ՝ հուլիսի 17-ին, և ստանձնի վարչապետի պաշտոնը երեք օր անց։

Քիր Սթարմերը հունիսին հայտարարել էր հրաժարականի մասին՝ իր կուսակցության ներսում աջակցության բացակայության պայմաններում։

Բերնեմը նախկինում երեք անընդմեջ ժամկետ զբաղեցրել է Մեծ Մանչեսթերի քաղաքապետի պաշտոնը, ինչի շնորհիվ նրան շնորհվել է «Հյուսիսի արքա» մականունը։ Հունիսի վերջին նա մտել է Համայնքների պալատ՝ որպես Մեյքերֆիլդի հյուսիսային անգլիական ընտրատարածքի պատգամավոր՝ ստանալու կուսակցության ղեկավարության համար պայքարելու հնարավորություն։

Քիր Սթարմերն իշխանության էր եկել 2024 թվականին՝ շնորհիվ Լեյբորիստական ​​կուսակցության համոզիչ հաղթանակի, սակայն արագորեն կորցրել է ժողովրդականությունը։ Նրա կուսակցությունը ծանր պարտություն է կրել մայիսին կայացած տարածաշրջանային և տեղական ինքնակառավարման մարմինների ընտրություններում։

Թարգմանությունը՝ Էմմա Չոբանյանի