Սերժ Սարգսյանը և Բարսեղ Բեգլարյանը չեն մասնակցի իրենց գործով դատական նիստերին. միջնորդությունները բավարարվեցին

ՀՀ երրորդ նախագահ Սերժ Սարգսյանին և «Ֆլեշ» ընկերության ղեկավար Բարսեղ Բեգլարյանին հնարավորություն տրվեց չմասնակցել իրենց գործով դատական նիստերին։

Հակակոռուպցիոն դատարանում նոր դատավոր Սարգիս Դադոյանի նախագահությամբ այսօր շարունակվեց Սարգսյանի և Բեգլարյանի գործով քննությունը։

Հիշեցնենք՝ շաբաթներ առաջ Բարձրագույն դատական խորհուրդը դադարեցրեց դատավոր Գիվի Հովհաննիսյանի լիազորությունները, ինչի հետևանքով Սերժ Սարգսյանի գործը կրկին վերամակագրվեց, այս անգամ այն կքննի Դադոյանը։

Նիստի սկզբում պաշտպանական կողմը միջնորդեց, որպեսզի նիստերն անցկացվեց առանց Սերժ Սարգսյանի և Բարսեղ Բեգլարյանի ներկայության. նոր փոփոխությունները թույլ են տալիս դատական նիստերն անցկացնել առանց ամբաստանյալների, եթե ներկա են նրանց պաշտպանները։ Մեղադրանքի կողմը չառարկեց, դատարանը բավարարեց միջնորդությունը՝ միաժամանակ պարզաբանելով, որ անհրաժեշտության դեպքում կամ կողմերից որևէ մեկի միջնորդությամբ նրանց մասնակցությունը կարող է ճանաչվել պարտադիր, և նրանք կհրավիրվեն դատարան։

Հիշեցնենք՝ Սերժ Սարգսյանի բոլոր գործերը միացվել և քննվում են մեկ վարույթով։ Նրան առաջադրվել է պետական աջակցության դիզելային վառելիքի ծրագրի շրջանակում առանձնապես խոշոր չափերով պետական միջոցների վատնում կազմակերպելու, ինչպես նաև առանձին դրվագներով կաշառք ստանալու և ձեռնարկատիրական գործունեությանն ապօրինի մասնակցելու վերաբերյալ մեղադրանքներ։

Վերջին գործով, ըստ Հակակոռուպցիոն կոմիտեի, նախկին նախագահը նպաստել է, որ իր հետ մտերիմ հարաբերությունների մեջ գտնվող գործարար Միխայիլ Բաղդասարովն ու նրա ընկերությունները ներգրավվեն արտասահմանյան ներդրումներով կառուցվող բիտումի գործարանի հիմնադրմանը։

Ռոզա Վարդանյան