24.08.2026 | 13:33
Էսօր կան ընկերություններ, որոնք պատրաստ են 400 մլն դոլար վճարել․ Փաշինյանը՝ երկաթգծի կոնցեսիայի մասին․ ՏԵՍԱՆՅՈՒԹ
ԵՄ երկրները Ռուսաստանից ռեկորդային քանակությամբ՝ շուրջ 9,9 միլիոն տոննա հեղուկ բնական գազ են գնել
Քաղաքականություն
13.07.2026 | 18:47
2026 թվականի առաջին կեսին ԵՄ երկրները Ռուսաստանի ամենախոշոր «Ямал СПГ» գործարանից ներմուծել են ռեկորդային քանակությամբ հեղուկ բնական գազ, գրում է Meduza-ն։
Financial Times-ը, վկայակոչելով Kpler-ի տվյալներին, գրում է, որ հունվարից հունիս ԵՄ երկրները ռուսական գործարանից գնել են 9,89 միլիոն տոննա հեղուկ բնական գազ , ինչը 18%-ով ավելի է նախորդ տարվա նույն ժամանակահատվածի համեմատ։ Գնված գազի արժեքը գնահատվում է մոտավորապես 6 միլիարդ եվրո։ Հիմնական գնորդներն են եղել Ֆրանսիան, Բելգիան և Իսպանիան։
ԵՄ երկրների համար երկարաժամկետ պայմանագրերով հեղուկ բնական գազ գնելու արգելքն ուժի մեջ կմտնի 2027 թվականի հունվարի 1-ից: Կարճաժամկետ պայմանագրերի սահմանափակումներն արդեն ուժի մեջ են 2026 թվականի գարնանից:
«Ямал СПГ»-ն ռուսական «Նովատեկ»-ի (50,1% վերահսկիչ բաժնեմասի), ֆրանսիական Total-ի (20%), Չինաստանի ազգային նավթային կորպորացիայի (20%) և չինական «Մետաքսի ճանապարհ» հիմնադրամի (9,9%) համատեղ ձեռնարկությունն է։
Ռուսաստանի և Ուկրաինայի միջև խոշոր պատերազմի սկսվելուց հետո Total-ը պահպանել է իր բաժնեմասը նախագծում։ Սակայն ընկերությունը հայտարարել է, որ, հավանաբար, ստիպված կլինի դուրս գալ դրանից պատժամիջոցների ուժի մեջ մտնելուց հետո, որոնք, ի թիվս այլ բաների, արգելում են եվրոպական ընկերություններին գնել ռուսական հեղուկ բնական գազ ԵՄ-ից դուրս վաճառքի համար։
Այս տարվա մարտին մեկնաբանելով ԵՄ-ի կողմից ռուսական հեղուկ բնական գազի ներմուծումն արգելելու որոշումը՝ Ռուսաստանի փոխվարչապետ Ալեքսանդր Նովակը հայտարարել էր, որ մատակարարումները կուղղվեն «բարեկամական» ասիական երկրներ։
Թարգմանությունը՝ Էմմա Չոբանյանի
