ՌԴ-ն պնդում է, թե ռազմական օդանավակայանների վրա ուկրաինական ԱԹՍ-ների լայնածավալ հարձակումներ է կանխել

ՌԴ Անվտանգության դաշնային ծառայությունը (ԱԴԾ) հայտարարել է, որ ձերբակալել են «Ուկրաինկա» (Ամուրի մարզ) և Շագոլ (Չելյաբինսկի մարզ) օդանավակայաններում ուկրաինական հատուկ ծառայությունների կողմից նախապատրաստվող ահաբեկչական հարձակումների «կատարողներին և հանցակիցներին», գրում է Meduza-ն։

ԱԴԾ-ի պնդմամբ՝ տեղեկություններ է ստացել այն մասին, որ Ուկրաինայի հատուկ ծառայությունների աշխատակիցները Բրյանսկի մարզ են տեղափոխել FPV անօդաչու թռչող սարքեր։ Այնուհետև դրանք «թշնամու գործակալների» ուժերով ավտոմեքենաներում կրկնակի հատակով կցորդներով տեղափոխել են օդանավակայանների մոտ գտնվող ավտոտնակներ, որոնցում հավաքվել են և պատրաստվել հարձակման։

«Յուրաքանչյուր անօրինական գործողություն ռուսական հատուկ ծառայությունների օպերատիվ հսկողության տակ է եղել և փաստաթղթավորվել է»,- ասվում է ԱԴԾ-ի հայտարարության մեջ։

Ձերբակալվածների անունները և կենսագրությունից մանրամասներ չեն բացահայտվում: Խուզարկությունների ընթացքում առգրավվել է 24 անօդաչու թռչող սարք, անօդաչուների կառավարման երկու շարժական կայան և ուկրաինացի համակարգողների հետ կապվելու համար նախատեսված «կապի սարքավորումներ»:

2025 թվականի հունիսին Ուկրաինայի անվտանգության ծառայությունն իրականացրել էր «Սարդոստայն» գործողությունը՝ ուկրաինական անօդաչու թռչող սարքերով հարձակվելով Ռուսաստանի չորս շրջաններում գտնվող ռազմական օդանավակայանների վրա։ Անօդաչուները թաքցրած տեղափոխել էին հինգ բեռնատարի վարորդներ։ Նրանցից մեկը զոհվել էր, իսկ մյուսները ձերբակալվել են ահաբեկչության մեղադրանքով։ Վարորդների հարազատներն ու ընկերները պնդում են, որ տեղյակ չեն եղել թաքցված անօդաչու թռչող սարքերի մասին։

Թարգմանությունը՝ Էմմա Չոբանյանի