Մոսկվայի ու Մոսկվայի մարզի վրա ուկրաինական ԱԹՍ-ների գրոհի հետևանքով զոհեր կան

Մոսկվայի մարզի Իստրայի Պիոներսկի բնակավայրում ուկրաինական անօդաչու թռչող սարքի անկման հետևանքով 3 մարդ զոհվել է, ևս 3-ը՝ վիրավորվել։ Այս մասին հայտարարել է Մոսկվայի մարզի նահանգապետ Անդրեյ Վորոբյովը, գրում է Meduza-ն։

Պիոներսկիում նաև հրդեհ է բռնկվել հինգ մասնավոր տներում։ Իստրայի Բաբկինո գյուղում վնասվել է ևս երկու մասնավոր տուն։ Սոլնեչնոգորսկում անօդաչուն հարվածել է բնակելի շենքի, որի հետևանքով վիրավորվել է 2 մարդ։

Հուլիսի 12-ի երեկոյից ի վեր Մոսկվան և Մոսկվայի մարզը ենթարկվել են ավելի քան 350 ուկրաինական անօդաչու թռչող սարքերի հարձակման, հայտարարել է Մոսկվայի քաղաքապետ Սերգեյ Սոբյանինը: Անօդաչուների մեծ մասը խոցվել է քաղաքից հեռու, մինչդեռ 50-ը ոչնչացվել է Մոսկվային մոտենալիս։

Վլադիմիրում խոցված անօդաչուն կոտրել է բազմահարկ բնակելի շենքի բնակարանի պատուհանները, հայտարարել է Վլադիմիրի մարզի նահանգապետ Ալեքսանդր Ավդեևը: Զոհեր և վիրավորներ չկան: 39 մարդ, այդ թվում՝ 8 երեխա, տարհանվել է շենքից:

Ստավրոպոլի երկրամասի նահանգապետը հայտնել է Շպակովսկի շրջանի Վյազնիկի գյուղի արդյունաբերական գոտում հրդեհի մասին։ Ըստ նրա՝ դեպքի վայրում են հրշեջները և այլ արտակարգ ծառայություններ։ Ուկրաինական Exilenova+ և Supernova+ ալիքները հայտնել են, որ Միխայլովսկի նավթաբազայում հրդեհ է բռնկվել։

Astra-ի տվյալներով՝ հրդեհը վերաբերում է Վյազնիկի գյուղի երկաթուղու մոտ գտնվող նավթաբազային։

Կրասնոդարի երկրամասի օպերատիվ շտաբը հայտնել է Թեմրյուկի շրջանի ձեռնարկություններից մեկում հրդեհի մասին: ԱԹՍ բեկորներն ընկել են նաև Իլյիչ գյուղի մասնավոր տան վրա: Բելորեչենսկի շրջանում ԱԹՍ-ի բեկորները վնասել են ձեռնարկություններից մեկի տարածքում գտնվող սարքավորումներ պարունակող անգարը։

Ուկրաինական տելեգրամ ալիքները, հղում անելով NASA-ի FIRMS ծառայությանը, հաղորդում են Ազովի ծովում հայտնաբերված հրդեհների մասին, որոնք, նրանց խոսքով, կարող են վկայել ռուսական «ստվերային նավատորմին» պատկանող լցանավերի վրա նոր հարվածների մասին:

Թարգմանությունը՝ Էմմա Չոբանյանի