Թրամփը հայտարարել է, որ հրահանգներ է թողել իր դեմ հնարավոր մահափորձի դեպքում

ԱՄՆ նախագահ Դոնալդ Թրամփը հայտարարել է, որ հրահանգներ է թողել այն դեպքի համար, եթե Իրանի իշխանությունները կազմակերպեն կամ փորձեն կազմակերպել իր դեմ մահափորձ։

Թրամփը Truth Social սոցիալական հարթակում գրել է, որ «հազար հրթիռ արդեն պատրաստ է կիրառման և ուղղված է Իրանի Իսլամական Հանրապետությանը, իսկ անհրաժեշտության դեպքում դրանց կհետևեն ևս հազարավորները, եթե Իրանի իշխանությունները փորձեն սպանել ԱՄՆ գործող նախագահին»։

Նա հավելել է, որ համապատասխան հրամաններն արդեն տրված են, և ԱՄՆ զինված ուժերը պատրաստ են, անհրաժեշտության դեպքում, լայնածավալ ռազմական գործողությունների։ Թրամփի խոսքով՝ այդ գործողությունները կարող են ամբողջությամբ ոչնչացնել Իրանի մի շարք շրջաններ, իսկ ռազմական արշավը, անհրաժեշտության դեպքում, կարող է երկարաձգվել։

Հուլիսի 8-ին ԱՄՆ-ն և Իրանը վերսկսել են փոխադարձ հարվածները։ Ավելի ուշ Թրամփը հայտարարել է, որ ավարտվել է դեռևս հունիսից գործող հրադադարը։

ԱՄՆ-ն նոր հարվածներ է հասցրել Իրանին՝ որպես պատասխան Օմանի տարածքային ջրերում, Հորմուզի նեղուցի մերձակայքում գտնվող երեք առևտրային նավերի վրա իրականացված հարձակումներին։ Միաժամանակ Վաշինգտոնը չեղարկել է այն արտոնագիրը, որը Թեհրանին թույլ էր տալիս նավթ արտահանել։ Իրանը պատասխան հարվածներ է հասցրել Քուվեյթում և Բահրեյնում տեղակայված ամերիկյան ռազմական բազաներին։

Ավելի վաղ Թրամփը հայտարարել էր, որ կարող է դառնալ մահափորձի զոհ, սակայն այդ հայտարարության օգտին որևէ ապացույց չէր ներկայացրել։

The New York Post-ին տված հարցազրույցում նա կրկնել է իր խոսքերը.

«Ես վաղուց նրանց թիրախների ցուցակում եմ։ Ես արդեն հրահանգներ եմ թողել։ Եթե ինձ հետ ինչ-որ բան պատահի, ապա նրանք պետք է ռմբակոծվեն այնպիսի մասշտաբով, ինչպիսին երբեք չեն տեսել»։

Միևնույն ժամանակ, The Wall Street Journal-ը, հղում անելով իր աղբյուրներին, գրել է, որ Իսրայելը ԱՄՆ-ին հետախուզական տվյալներ է փոխանցել, որոնց համաձայն՝ Իրանը քննարկում է ԱՄՆ նախագահի դեմ նոր մահափորձի ծրագիր։

Սակայն Թրամփը հերքել է այդ տեղեկությունը՝ հայտարարելով.

«Ո՛չ, ո՛չ։ Իսրայելը ոչինչ չի հայտնաբերել։ Ես վաղուց առաջին համարի թիրախն եմ, և այդպիսին է կյանքը։ Հուսով եմ՝ եթե ինչ-որ բան պատահի, դուք ինձ կկարոտեք»։