10.07.2026 | 15:22
«Մարտին սթար»-ի վանիլային բրիկետ պաղպաղակի արտադրական գործունեությունը կասեցվել է
Իսպանիայի հարավում անտառային հրդեհների հետևանքով առնվազն 12 մարդ է զոհվել․ ՏԵՍԱՆՅՈՒԹ
Քաղաքականություն
10.07.2026 | 14:07
Հարավային Իսպանիայի Ալմերիա նահանգում անտառային հրդեհների հետևանքով զոհվել է առնվազն 12 մարդ, կան տուժածներ։ Այս մասին հայտնել են տարածաշրջանային իշխանությունները: Անդալուսիայի ինքնավար շրջանի իշխանությունները հուլիսի 10-ի առավոտյան հայտնել են, որ զոհերից մի քանիսին մահացած են գտել իրենց մեքենաներում, գրում է DW-ի ռուսական ծառայությունը։
Հրդեհը բռնկվել է երեկ կեսօրին: Անդալուսիայի փրկարարական ծառայությունն այսօր առավոտյան հայտնել է, որ հրդեհի դեմ պայքարում է շուրջ 150 հրշեջ: Տարածաշրջանային իշխանություններն արտակարգ դրություն են հայտարարել։ Ըստ որոշ տեղեկությունների՝ 19 մարդ անհետ կորած է համարվում։
Անդալուսիայի առողջապահության և արտակարգ իրավիճակների նախարար Անտոնիո Սանսը ստեղծված իրավիճակն անվանել է «աննախադեպ ողբերգություն» և «մինչ օրս տարածաշրջանում ամենաավերիչ հրդեհը»։
Ականատեսներն արտակարգ ծառայություններին հայտնել են, որ հրդեհն առաջացել է չոր բուսականության վրա ընկած էլեկտրական մալուխի պատճառով: Դեպքը տեղի է ունեցել գլխավոր մայրուղու մոտ, կրակն արագ տարածվել է ճանապարհին հարակից անտառում: Ալմերիայի Լոս Գալյարդոս համայնքում ավելի վաղ հաղորդվել էր 6 մահվան դեպքի մասին: Տասնյակ մարդիկ տարհանվել են:
Մայիսին և հունիսին աննախադեպ շոգը չորացրել է Արևմտյան Եվրոպայի հսկայական տարածքներ՝ դրանք դարձնելով հատկապես խոցելի հրդեհների նկատմամբ: Համաշխարհային օդերևութաբանական կազմակերպության տվյալներով՝ Եվրոպան տաքանում է համաշխարհային միջին ցուցանիշից երկու անգամ ավելի արագ, ինչն ուժեղ շոգի շրջանները դարձնում է ավելի հավանական։
Այս շաբաթվա սկզբին Իսպանիայի սահմանի մոտ գտնվող Ֆրանսիայի հարավում բռնկված անվերահսկելի անտառային հրդեհը ստիպել է տարհանվել ավելի քան 10,000 մարդու։ Անտառային հրդեհների եվրոպական տեղեկատվական համակարգի տվյալներով՝ 2025 թվականին Իսպանիայի տարածքի ավելի քան 393,000 հեկտարը ծածկվել է հրդեհներով:
Թարգմանությունը՝ Էմմա Չոբանյանի
