Սաակաշվիլին հայտարարել է, որ Պուտինը պարտվում է Ուկրաինայում և էքսպանսիա կսկսի Բելառուսի, Վրաստանի և Հայաստանի ուղղությամբ

Նա նշել է, որ Ռուսաստանի նախագահ Վլադիմիր Պուտինն արդեն Բիձինա Իվանիշվիլիից պահանջել է օկուպացված Աբխազիան և Հարավային Օսիան ճանաչել որպես անկախ պետություններ։ Ըստ նրա՝ Իվանիշվիլին դա չի կարող անել, քանի որ այն կարմիր գիծ է նույնիսկ նրա սեփական ընտրազանգվածի համար (Ռուսաստանը ճանաչել է Վրաստանի օկուպացված Հարավային Օսիայի և Աբխազիայի «անկախությունը» 2008 թվականին): Քանի որ Իվանիշվիլին դանդաղում է, Ռուսաստանն արագացրել է Հարավային Օսիայի բռնակցումը, Պուտինը նաև ռուս պաշտոնյայի է նշանակել որպես ղեկավար: Սաակաշվիլին կարծում է, որ սա կհանգեցնի «Թբիլիսիի լիակատար գրավմանը», և դա «ամենևին էլ դժվար խնդիր չէ», քանի որ, նրա գնահատմամբ, Իվանիշվիլին Ռուսաստանի պահանջով փաստացի ոչնչացրել է վրացական զինված ուժերը, տնտեսությունը 99%-ով կախված է Ռուսաստանից: Վրաստանն այլևս ընկերներ չունի, որոնք կարող են օգնել նրան, հետևաբար, միայն ժամանակի հարց է, թե երբ կհաստատվի լիակատար վերահսկողությունը, հավելել է Սաահակաշվիլին։

Նրա կարծիքով՝ ՌԴ-ն կփորձի գրավել նաև Հայաստանը։

«Պուտինը կփորձի գրավել նաև Հայաստանը, քանի որ նա արհամարհում է Փաշինյանին և կարող է հույսը դնել այնտեղ հզոր հինգերորդ շարասյան վրա։ Հայաստանը գրավելն անհնար է առանց Վրաստանի նկատմամբ վերահսկողության»,- ասել է նա։

Վրաստանի նախկին նախագահը նաև հայտարարել է, որ «գոհ» է ԱՄՆ նախագահ Դոնալդ Թրամփի գործողություններից. «Գիտեմ, որ շատ ուկրաինացիների իրականում դուր չեն գալիս նրա հայտարարությունները, բայց նայեք Ուկրաինային զենքի մատակարարումներին, Ռուսաստանի դեմ տնտեսական պատժամիջոցներին, որոնք շատ ավելի արդյունավետ են, քան 21-րդ եվրոպական պատժամիջոցների փաթեթը, նայեք, թե ինչպես են ամերիկացիները Ռուսաստանին դուրս մղում Կովկասից, և դուք կհասկանաք, որ Ռոնալդ Ռեյգանից ի վեր ոչ մի ամերիկացի նախագահ այդքան կոշտ չի եղել Ռուսաստանի նկատմամբ»։

Սաակաշվիլին նաև վստահություն է  հայտնել, որ Ուկրաինային կընդունեն ԵՄ, բայց դա կլինի «դժվար գործընթաց»։

«Ես ատում եմ կոռուպցիան, բայց չեմ համարում այն ​​Ուկրաինայի անդամակցության գլխավոր խոչընդոտը։ Իրականում, Ռումինիան և Բուլղարիան ավելի կոռումպացված էին, երբ միացան ԵՄ-ին, իսկ, օրինակ, Չեռնոգորիան զգալիորեն ավելի կոռումպացված է, քան Ուկրաինան (ես դա գիտեմ անձնական փորձից), այնուամենայնիվ, այն շատ մոտ է անդամակցությանը»,- նշել է նա։

Սաակաշվիլին նաև կարծիք է հայտնել, որ Ռուսաստանի ազդեցության կորուստը Կովկասում Ուկրաինայի կողմից առաջնագծում նրա զսպման ուղղակի հետևանք է։

«Անկեղծ ասած, Ռուսաստանի պատմական կորուստները Ռումինիայում, Մոլդովայում, Ադրբեջանում, Հունգարիայում, Հայաստանում և նույնիսկ Աֆրիկայում Զելենսկիի հանճարեղ արտաքին քաղաքականության ուղղակի հետևանքն են։ Ռազմավարություն, որին նա հետևել է այս ամբողջ ընթացքում։ Հավասարումը պարզ է. եթե Ռուսաստանը պարտվի Ուկրաինայում, ապա կպարտվի ամենուր։ Եվ Զելենսկին կդառնա ամբողջ տարածաշրջանի ազատագրողը»,- ասել է նա։