Իսրայելը հետախուզական տվյալներ է փոխանցել ԱՄՆ-ին Թրամփին սպանելու «Իրանի նոր դավադրության վերաբերյալ»․ ԶԼՄ-ներ

Իսրայելն այս շաբաթ Միացյալ Նահանգներին հետախուզական տվյալներ է փոխանցել Իրանի կողմից նախագահ Դոնալդ Թրամփին սպանելու նոր և «կոնկրետ» ծրագրի մասին։ Այս մասին հաղորդել են ամերիկյան լրատվամիջոցները, գրում է France 24-ը։

Հաղորդագրությունները հրապարակվել են այն ժամանակ, երբ ԱՄՆ-ի և Իրանի կողմից վերսկսված հարձակումները լայնածավալ պատերազմի վերաբերյալ մտավախություններ են առաջացրել, ինչպես նաև այն բանից հետո, երբ Թրամփը ՆԱՏՕ-ի գագաթնաժողովից հետո Թուրքիայից հեռանալիս արտասովոր կերպով հին ինքնաթիռ է օգտագործել։

Վաշինգտոնը հետևում էր Թրամփին սպանելու հնարավոր ծրագրերի վերաբերյալ հետախուզական տվյալների «անընդհատ հոսքին», «սակայն Իսրայելից ստացված նախազգուշացումը նոր էր և կենտրոնացած էր որոշակի դավադրության վրա», CNN-ին հայտնել են թեմային ծանոթ աղբյուրները։

Աղբյուրներից մեկը նշել է, որ նախազգուշացումը փոխանցվել է այս շաբաթ։ Ամերիկացի այլ պաշտոնյաներ ենթադրել են, որ իսրայելական զեկույցը կարող է լինել Թրամփի որոշումների կայացման վրա ազդելու փորձ, մինչ նա քննարկում է՝ ակտիվացնե՞լ ռազմական գործողություններն Իրանի դեմ, թե՞ ոչ։ Թրամփի դեմ դավադրության մանրամասները դեռևս պարզ չեն, և իրավիճակին ծանոթ երկու աղբյուրներ նշել են, որ ԱՄՆ-ն անկախ կերպով չի ստուգել կամ վերահսկել այն մինչև իսրայելական նախազգուշացումը։

The Wall Street Journal-ը նույնպես, հղում անելով անանուն աղբյուրների, հաղորդել է, որ հետախուզական տվյալները նկարագրում են «նոր» դավադրություն։

Թեհրանը տարիներ շարունակ խոստացել է հակահարված տալ Թրամփին՝ պաշտոնավարման առաջին ժամկետի ընթացքում 2020 թվականի հունվարին իրանցի գեներալ Ղասեմ Սոլեյմանիի սպանության հրաման տալու համար։

Այս տեղեկությունների հետ կապված AFP-ի մեկնաբանության խնդրանքին ի պատասխան՝ Սպիտակ տունը մատնանշել է Թրամփի չորեքշաբթի օրվա խոսքերը։

«Նրանք ուզում են վերացնել ԱՄՆ առաջնորդին՝ ինձ։ Ես ինչ-որ ցուցակում եմ։ Այսօր առավոտյան տեսա, որ ես նրանց բոլոր ցուցակներում եմ»,- ասել էր Թրամփը լրագրողներին ՆԱՏՕ-ի գագաթնաժողովից վերադառնալիս։

Թարգմանությունը՝ Էմմա Չոբանյանի