10.07.2026 | 11:54
Ադրբեջանը պնդում է, որ Բաքվի ջանքերով կասեցվել է Իսրայելի կողմից Հայոց ցեղասպանության ճանաչման գործընթացը
Ուկրաինական ԱԹՍ-ների հարվածներից ՌԴ-ում նավթավերամշակման գործարան և նավթաբազաներ են հրդեհվել
Քաղաքականություն
10.07.2026 | 10:56
Կրասնոդարի Սևերսկի շրջանի Իլսկի նավթավերամշակման գործարանում հրդեհ է բռնկվել տարածաշրջանը գրոհած ուկրաինական անօդաչու թռչող սարքերի բեկորների անկման հետևանքով։ Այս մասին հայտնել է տարածաշրջանի օպերատիվ շտաբը, գրում է Meduza-ն։
ԱԹՍ-ի բեկորներ են ընկել նաև Սևերսկայայում՝ մասնավոր տան բակում և ձեռնարկություններից մեկի տարածքում։ Տեղական իշխանությունների նախնական տվյալներով՝ զոհեր չկան։ Ականատեսները նկարահանել են հրդեհը, որը, ենթադրաբար, բռնկվել է Իլսկի նավթավերամշակման գործարանում։
«Տրանսնեֆտ» խողովակաշարային համակարգին միացված Իլսկի նավթավերամշակման գործարանը Հարավային դաշնային շրջանի առաջատար ձեռնարկություններից է: Այն նախկինում նույնպես ուկրաինական օդային հարվածների թիրախ է դարձել։
Ռոստովի մարզում ուկրաինական անօդաչու թռչող սարքի հարձակումը հրդեհներ է առաջացրել Ազովի նավթի երկու պահեստներում և Տագանրոգի նավահանգստում, հայտնել է տարածաշրջանի ղեկավար Յուրի Սլյուսարը։ Բացի այդ, Տագանրոգում ընկած անօդաչու թռչող սարքերի բեկորները վնասել են մասնավոր տուն և վարչական շենքի տանիք, հրդեհ է առաջացել: Ազովի շրջանի Կագալնիկ գյուղում նույնպես հրդեհ է բռնկվել վարչական շենքում։
Նախնական տեղեկությունների համաձայն՝ տարածաշրջանում զոհեր չկան: Տագանրոգում անօդաչու թռչող սարքերի հարվածների վայրերի մոտ գտնվող տների բնակիչները տարհանվում են, հայտնել են քաղաքային իշխանությունները։ Astra-ն ականատեսների տեսանյութերը վերանայելուց հետո եզրակացրել է, որ հրդեհը տեղի է ունեցել Տագանրոգ նավահանգստում «Կուրգաննեֆտեպրոդուկտ» նավթաբազայում։
Ընդհանուր առմամբ, ՌԴ ՊՆ-ի հաղորդմամբ, հուլիսի լույս 10-ի գիշերը ՀՕՊ համակարգերը որսացել և ոչնչացրել են ուկրաինական 376 անօդաչու թռչող սարք 12 շրջաններում, բռնակցված Ղրիմում և Ազովի ծովի վրա։
Թարգմանությունը՝ Էմմա Չոբանյանի
