Անկլավների թեմայից չենք կարող հրաժարվել, պետք է հարցին լուծում տանք. Փաշինյան․ ՏԵՍԱՆՅՈՒԹ

Վարչապետ Նիկոլ Փաշինյանը հայտարարել է, որ Հայաստանը չի կարող հրաժարվել անկլավների և էքսկլավների թեմայից և պետք է լուծում տա Արծվաշենի ու մյուս տարածքների հարցին՝ հիմնվելով 1991թ. Ալմա-Աթայի հռչակագրի սկզբունքների վրա։

Նա ընդգծել է, որ նույնիսկ Ադրբեջանի դրամի և անձնագրերի վրա Արծվաշենն արտահայտված է որպես այդ երկրին դե յուրե չպատկանող տարածք, ինչը կարևոր նրբություն է հայկական կողմի դիրքորոշումները մշակելիս։ Ըստ Փաշինյանի՝ խնդրի լուծման տարբերակները ներառում են կա՛մ տարածքների համարժեք փոխանակում, կա՛մ սահմանի օպտիմալացում, իսկ եթե ընտրված լուծումը պահանջի սահմանադրական փոփոխություններ, ապա կառավարությունը կդիմի ժողովրդի կամարտահայտմանը։

«Խաղաղության տրամաբանությունը ուրիշ բան է, կոնֆլիկտի տրամաբանությունը՝ ուրիշ։ Կոնֆլիկտի տրամաբանությունն այն է, որ ով ինչ վերցրեց՝ իրենն է, բայց մենք հրաժարվել ենք այդ տրամաբանությունից։ Մենք ասում ենք՝ Հայաստանի անկախ հանրապետության ճշգրիտ տարածքը նույնական է Խորհրդային Հայկական ԽՍՀ տարածքի հետ՝ 29,743 քառակուսի կիլոմետր։ Ադրբեջանի տարածքն էլ ճշգրիտ նույնական է Խորհրդային Ադրբեջանի տարածքի հետ։

Խորհրդային տարբեր հանրագիտարաններում Ադրբեջանի տարածքի չափը փոխվում է Կասպից ծովի մակարդակի հետ կապված, բայց խոսքը սահմանի մասին է։ Այս հարցերը մենք խաղաղության տրամաբանությամբ պետք է հասցեագրենք՝ առանց իրար համար պրոբլեմներ ստեղծելու։ Բայց եթե կգանք այնպիսի լուծման, որը ժողովրդի կամարտահայտման կարիքը կունենա համաձայն ՀՀ Սահմանադրության, այդ հարցով, բնականաբար, ժողովրդին կդիմենք»,- ասել է նա։

Մանրամասները՝ տեսանյութում։