Պաշտոնապես ասում եմ` բոլորիդ անձնական տվյալները ինչ-որ մի տեղ կուտակվում են, ոչ մի գաղտնիք չունեք․ ՏԵՍԱՆՅՈՒԹ

Կառավարությունը հաստատել է առողջության համընդհանուր ապահովագրության շրջանակներում բոնուսային միավորների հաշվարկման կարգը, որը թույլ կտա քաղաքացիներին 2029 թվականից ստանալ զեղչեր և արտոնություններ՝ առողջ ապրելակերպ վարելու համար։

Ըստ նախագծի՝ բոնուսներ կտրամադրվեն ծխելուց հրաժարվելու, արյան դոնորության և մարմնի զանգվածի ինդեքսի նորմավորման դեպքում, սակայն վարչապետ Նիկոլ Փաշինյանը կասկածի տակ է դրել լաբորատոր ստուգումների արդյունավետությունը՝ առաջարկելով բոնուսները կապել թվային հետագծելիության և անկանխիկ գնումների հետ։ Այս համատեքստում վարչապետը նշել է, որ 21-րդ դարում մարդիկ այլևս գաղտնիքներ չունեն, քանի որ նրանց բոլոր անձնական տվյալները կուտակվում են համաշխարհային հարթակներում, և պետությունը պետք է օգտագործի այդ տվյալները քաղաքացիների առողջությունն ու անվտանգությունը երաշխավորելու համար։

«Պաշտոնապես ասում եմ՝ ժողովուրդ ջան, բոլորիդ բոլոր անձնական տվյալները ինչ-որ մի տեղ կուտակվում են, դուք ոչ մի գաղտնիք չունեք 21-րդ դարում։ Այդ գաղտնիքները միայն ազնիվ խոսքի վրա են։ Մենք պետք է քաղաքականություն վարենք։ Եթե մենք երաշխիքներ չդնենք, որ տվյալները քաղաքացու դեմ չեն օգտագործվելու, ոչինչ չենք կարող անել։ Ավելի լավ է ունենալ թվային վերահսկողություն, քան հազարավոր նոր տեսուչներ ու քննիչներ վարձել։ Եկեք լայնորեն քննարկենք երաշխիքները, որպեսզի քաղաքացիները համոզվեն, որ բացի գլոբալ վերահսկողներից, տեղական ոչ մի մարմին տվյալներին չի տիրապետում չարամտորեն։ Եթե քո թևին «շտապօգնություն» է կապված սարքի տեսքով, ապա ապահովագրության ռիսկը նվազում է, և արժեքը պետք է ավելի ցածր լինի։ Սա պետության և ժողովրդի անվտանգության հարց է։ Ով ուզում է, թող օգտվի կամավորության սկզբունքով։ Մոտիվացիան շատ կարևոր բան է»,- ասել է նա։

Մանրամասները՝ տեսանյութում։