Բայրամովը հայտարարել է, թե խաղաղության պայմանագիրը կարող է ստորագրվել ՀՀ Սահմանադրության փոփոխությունից հետո միայն

Ադրբեջանի և Հայաստանի միջև աշխատանքներ են տարվում սահմանազատման և սահմանագծման ուղղությամբ։ Այս մասին  լրագրողների հետ զրույցում հայտարարել է Ադրբեջանի արտգործնախարար Ջեյհուն Բայրամովը, գրում են ադրբեջանական լրատվամիջոցները։

Նա նշել է, որ համապատասխան հանձնաժողովներ են ստեղծվել։

«Աշխատանքը շարունակվում է կանոնավոր կերպով։ Մենք արդեն ականատես ենք եղել առաջին դրական արդյունքներին. պետական ​​սահմանի մոտ 13 կմ հատվածը սահմանազատվել է»,- ասել է նա։

Բայրամովը նշել է, որ կողմերի միջև որոշակի համաձայնություններ են ձեռք բերվել. «Սահմանազատման գործընթացը կշարունակվի հյուսիսից հարավ։ Գործընթացը կիրականացվի, էքսկլավային գյուղերի հարցերին լուծումներ կգտնվեն»։

Նա նաև հայտարարել է, որ «Ադրբեջանական կողմն ավարտել է խաղաղության համաձայնագրի վերջնական մշակման աշխատանքների իր մասը»՝ հիշեցնելով, որ Վաշինգտոնի գագաթնաժողովում Ադրբեջանի և Հայաստանի միջև ստորագրվել է համատեղ հայտարարություն։

«Խաղաղության համաձայնագրի տեքստն արդեն նախաստորագրվել է և բաց է հանրության համար: Ադրբեջանի մոտեցումն այս հարցում սկզբունքային է: Նախագահ Իլհամ Ալիևը արտահայտել է պետության պաշտոնական դիրքորոշումը: Մենք ակնկալում ենք, որ Ադրբեջանի նկատմամբ տարածքային պահանջները կհեռացվեն Հայաստանի Սահմանադրությունից: Դրանից հետո կարող է ստորագրվել խաղաղության համաձայնագիրը»,- հայտարարել է նա։

Բացի այդ, Բայրամովը կրկին, այսպես կոչված, «Զանգեզուրի միջանցք» եզրույթն է օգտագործել։

«Մեզ տեղեկացրել են, որ աշխատանքներ են ընթանում Զանգեզուրի միջանցքի ճանապարհային և երկաթուղային նախագծի վրա, որն անցնում է Հայաստանով։ Միացյալ Նահանգները նույնպես աջակցում է դրան: Այս հարցի շուրջ բանակցությունները շարունակվում են Միացյալ Նահանգների և Հայաստանի միջև: Սակայն TRIPP-ի մուտքի և ելքի կետերը գտնվում են Ադրբեջանի տարածքում: Հետևաբար, մեր ամերիկացի գործընկերները մեզ տեղյակ են պահում: Մեզ ասվել է, որ գործընթացը շարունակվում է. փաստաթղթերի պատրաստման փուլն այժմ ընթացքի մեջ է»,- հայտարարել է ադրբեջանցի պաշտոնյան։

Թարգմանությունը՝ Էմմա Չոբանյանի