Տվերի և Ստավրոպոլի նավթաբազաները հրդեհվել են ուկրաինական ԱԹՍ-ների հարձակման հետևանքով

Ռուսական Տվերում ուկրանական անօդաչու թռչող սարքերի հարձակման հետևանքով հրդեհ է բռնկվել «Տվերի նավթաբազա» ձեռնարկության պահուստարաններից մեկում, հայտնել է Տվերի մարզի նահանգապետ Վիտալի Կորոլյովը, գրում է Meduza-ն։

Հրշեջները մարել են հրդեհը։ Իշխանությունների նախնական հաղորդագրությունների համաձայն՝ տեղի բնակիչների կամ  աշխատակիցների շրջանում վիրավորներ չկան։

Astra-ն հայտնում է, որ նավթաբազան «Սուրգուտնեֆտեգազ» ԲԲԸ դուստր ձեռնարկությունն է: Ընկերությունը բենզին և վառելիք է մատակարարում 52 բենզալցակայաններից բաղկացած սեփական ցանցին և Տվերի մարզում մեծածախ բաշխմանը: Հարձակումից առաջ հրապարակված լուսանկարներից դատելով՝ բազան փորձել են պաշտպանել հակադրոնային ցանցերով:

Ստավրոպոլի երկրամասի Վյազնիկի գյուղի արդյունաբերական օբյեկտում նույնպես ուկրաինական անօդաչուների հարձակման հետևանքով հրդեհ է բռնկվել, հայտարարել է նահանգապետ Վլադիմիր Վլադիմիրովը։ Նա չի նշել կոնկրետ օբյեկտը։

Վլադիմիրովը նախ հայտարարել է, որ բնակելի շենքեր կրակի տարածման վտանգ չկա, սակայն ավելի ուշ պարզաբանել է, որ հրդեհը սաստկացել է։ Գործարանին ամենամոտը գտնվող շենքերի բնակիչները տարհանվել են։ Նախնական տեղեկությունների համաձայն՝ տուժածներ չկան։

Astra-ն նաև հաղորդում է, որ Ստավրոպոլի երկրամասում նավթաբազա է այրվում։ Ըստ աղբյուրների՝ հրդեհը բռնկվել է Վյազնիկիի նավթաբազայում։

Ռոստովի մարզի նահանգապետ Յուրի Սլյուսարը, իր հերթին հայտնել է, որ ուկրաինական անօդաչու թռչող սարքերը երկրորդ օրն անընդմեջ հարձակվել են Տագանրոգի ծոցում գտնվող երկու լցանավերի վրա։ Նավերում հրդեհներ են բռնկվել։ Վիրավորներ չկան, լցանավերի անձնակազմերը տարհանվել են։

Խերսոնի մարզի օկուպացիոն վարչակազմի ղեկավար Վլադիմիր Սալդոն հայտարարել է, որ մարզի բոլոր շրջանները լիովին կամ մասնակիորեն հոսանքազրկված են։ Ուկրաինական կողմն անօդաչու թռչող սարքեր է օգտագործում ռուսական զորքերի կողմից օկուպացված տարածքներում գտնվող էլեկտրական ենթակայանների և այլ ենթակառուցվածքների վրա հարձակվելու համար։

Ռուսաստանի Պաշտպանության նախարարությունը հայտնել է, որ հուլիսի 9-ի առավոտյան ՀՕՊ ուժերը երկրի 11 շրջաններում, բռնակցված Ղրիմում և Ազովի ծովի վրա ուկրաինական 73 անօդաչու թռչող սարք են որսացել ու ոչնչացրել։

Թարգմանությունը՝ Էմմա Չոբանյանի