Ծառուկյանի առանձնատանը մնացած կենդանիները կերակրվում են․ ՔԿ

Անասնապահին թույլատրվել և թույլատրվում է մտնել Գագիկ Ծառուկյանի առանձնատուն և կերակրել կենդանիներին։ Այս մասին Factor TV–ի հետ զրույցում հայտնեց Քննչական կոմիտեի մամուլի քարտուղար Կիմա Ավդալյանը։

Ավելի վաղ Factor TV-ի տաղավարում «Դեմոկրատական այլընտրանք» կուսակցության Քաղաքական խորհրդի նախագահ, նախկինում ԲՀԿ ցուցակով պատգամավորության թեկնածու Սուրեն Սուրենյանցը հայտարարել է, թե Ծառուկյանի առանձնատանը մնացած կենդանիները սովամահ են լինում։

«Կարծեմ, մեկ տասնյակից ավելի ձիեր ու կոկորդիլոսներ կային, իրենք սովահար են եղել, որովհետև աշխատողներին չեն թողնում մոտենալ։ Ազնվացեղ ձիեր են, գոնե ձիերին գիտեմ, տեսել եմ, և այդ կենդանիները սովահար վիճակում են այս պահին։ Սա էլ հակահումանիստական բան է։ Այս պատմության միակ մխիթարիչ հանգամանքը (իհարկե, կես կատակ, դառը կատակ է)՝ առյուծը շատ մարդկանցից ավելի արժանապատիվ էր և չուզեցավ համակերպվել ՔՊ-ական որևէ պաշտոնյայի հետ և գերադասեց տենց արժանապատիվ հեռանալ»,- ասել էր Սուրենյանցը։

Հիշեցնենք՝ ավելի վաղ Կենդանաբանական այգուց հայտնել են, որ իրենց մոտ տեղափոխված էգ առյուծը, «պայմանավորված մեծ տարիքով և ուղեկցող հիվանդություններով քնեցումից չի արթնացել, և դա արձանագրված է հերձման ակտով»։

«Կենդանու օրգան համակարգերը եղել են ախտահարված` փայծախը, լյարդը, թոքերը, սիրտը, լեղապարկում խոլեցիստիտային փոփոխություններ, առկա է ճարպակալում, որովայնի խոռոչում առկա է ազատ հեղուկ` ինչը տարիքային փոփոխությունների հետևանք է»,- նշել են այգուց։

Ծառուկյանն այժմ կալանավորված է, գտնվում է քրեակատարողական հիմնարկում։

Քննչական կոմիտեի փոխանցմամբ՝ Գագիկ Ծառուկյանը կազմակերպել և ղեկավարել է հանցավոր խումբ, որը Իրան-Հայաստան լոգիստիկ կապեր ստեղծելու պատրվակով, խաբեությամբ ու փաստաթղթեր կեղծելով, իրանական ընկերություններից հափշտակել է 52 միավոր տրանսպորտ, տեխնիկա և ապրանքներ՝ պատճառելով շուրջ 22 միլիոն դոլարի վնաս։

Բացի այդ, նա անցնում է նաև վայրի կենդանի կամ թռչուն ապօրինի որսալու դեպքի առթիվ նախաձեռնված քրեական վարույթով։ Հենց այդ առիթով էլ Գագիկ Ծառուկյանի առանձնատնից առգրավվել էին տարբեր կենդանիների և թռչունների 190 հատ խրտվիլակ, ինչպես նաև 3 առյուծ և 1 վագր, որոնք ճանաչվել են որպես իրեղեն ապացույց և տեղափոխվել Կենդանաբանական այգի։

Եվգենյա Համբարձումյան