11.10.2026 | 10:11
Շանհայ. Կարեն Խաչանովը դուրս եկավ 1/8 եզրափակիչ
ՆԱՏՕ-ի գլխավոր քարտուղարը Պուտինին կոչ է արել «չխաղալ» դաշինքի հետ
Քաղաքականություն
08.07.2026 | 11:59
ՆԱՏՕ-ն «կպաշտպանի մեր ժողովրդավարությունները և մեր տարածքը»։ Անկարայում անցկացվող ՆԱՏՕ-ի գագաթնաժողովի երկրորդ օրվա մեկնարկին հրավիրված ասուլիսում այս մասին հայտարարել է դաշինքի գլխավոր քարտուղար Մարկ Ռյուտեն՝ պատասխանելով Ռուսաստանին և Վլադիմիր Պուտինին ուղղված ուղերձի մասին լրագրողի հարցին, գրում է BBC-ի ռուսական ծառայությունը։
«Իմ ուղերձն այն է, որ այս դաշինքը, որը կազմված է Եվրոպայում, Կանադայում և Միացյալ Նահանգներում ապրող մեկ միլիարդ մարդկանցից, կպաշտպանի իր տարածքի յուրաքանչյուր սանտիմետրը։ Դուք չեք կարող հաղթել ՆԱՏՕ-ին։ Մենք պաշտպանական դաշինք ենք, մենք երբեք ոչ մեկի վրա չենք հարձակվի։ [Բայց] մենք կպաշտպանենք մեր կենսակերպը, մեր ժողովրդավարությունները, մեր տարածքը։ Այնպես որ՝ մի՛ կատակեք մեզ հետ, մի՛ խաղացեք մեզ հետ»,- հայտարարել է Ռյուտեն։
Բացի այդ, նա նշել է, թե ակնկալում է, որ գագաթնաժողովի արդյունքներով ընդունվելիք հռչակագրում Ռուսաստանը կհիշատակվի որպես ՆԱՏՕ-ի համար երկարաժամկետ սպառնալիք։
«Ես ակնկալում եմ, որ այսօր մենք միասին կճանաչենք, որ Ռուսաստանը երկարաժամկետ սպառնալիք է ներկայացնում ՆԱՏՕ-ի տարածքի համար։ Մենք կծանոթանանք հռչակագրին, երբ այն հրապարակվի, բայց ակնկալում եմ, որ Ռուսաստանից եկող երկարաժամկետ սպառնալիքի մասին կրկին կհիշատակվի»,- հայտարարել է նա։
Ավելի վաղ Reuters-ը, որը ծանոթացել էր եզրափակիչ հայտարարության նախագծին, հայտնել էր, թե սպասվում է, որ ՆԱՏՕ-ի առաջնորդները կհայտարարեն դաշինքի միասնության և կոլեկտիվ պաշտպանության սկզբունքի նկատմամբ իրենց «երկաթե հանձնառության» մասին։
Չորեքշաբթի Անկարայում սպասվում է պաշտոնական հանդիպում, որին կմասնակցի նաև ԱՄՆ նախագահ Դոնալդ Թրամփը։
Թարգմանությունը՝ Էմմա Չոբանյանի
