Ուկրաինական ԱԹՍ-ները հարվածել են Սարատովի և Նիժնեկամսկի նավթավերամշակման գործարաններին, Վորոնեժում՝ ռազմական օդանավակայանի

Ուկրաինական ուժերը հուլիսի լույս 8-ի գիշերը կրկին հարվածներ են հասցրել ռուսական նավթավերամշակման գործարաններին, նաև հարձակվել լցանավերի և ռազմական օդանավակայանի վրա, գրում է Meduza-ն։

Astra-ի և ուկրաինական Exilenova+ տելեգրամ ալիքի տվյալներով՝ Սարատովում ԱԹՍ-ների հարվածի հետևանքով հրդեհ է առաջացել նավթավերամշակման գործարանում։ Տարածաշրջանի ղեկավար Ռոման Բուսարգինը հայտնել է, որ անօդաչու թռչող սարքի հարվածի հետևանքով մեկ մարդ զոհվել է, մի քանիսը՝ վիրավորվել։ Բուսարգինը նաև հայտարարել է, թե քաղաքացիական ենթակառուցվածքներ են վնասվել, բայց չի նշել, թե ինչի մասին է խոսքը։

Հարված է հասցվել նաև Թաթարստանի Նիժնեկամսկի արդյունաբերական գոտուն, որտեղ գտնվում են «Нижнекамскнефтехим» գործարանը և «ТАИФ-НК» նավթավերամշակման համալիրը: Ականատեսների տարածած լուսանկարների և տեսանյութերի համաձայն՝ արդյունաբերական գոտում հրդեհ է բռնկվել: Թաթարստանի իշխանությունները հաստատել են քաղաքի վրա հարձակումը, բայց որևէ հետևանքի մասին չեն հայտնել:

Բացի այդ, Դոնի Ռոստով ուղևորվող երկու լցանավեր վնասվել են Տագանրոգի ծոցում ուկրաինական անօդաչու թռչող սարքերի հարձակման հետևանքով, հայտնել է մարզի ղեկավար Յուրի Սլյուսարը։ Նավերը դատարկ են եղել։ Երկու մարդ թեթև վիրավորվել է։ Անձնակազմը տարհանվել է նավերից մեկից։

Վորոնեժի մարզի Բորիսոգլեբսկի ռազմական օդանավակայանում հրդեհ է բռնկվել, հաղորդում է Astra-ն։ Տեղական իշխանությունները հաստատել են, որ Բորիսոգլեբսկ քաղաքում հայտարարվել է օդային տագնապ՝ ուկրաինական անօդաչու թռչող սարքերի հարձակման պատճառով։

Ռուսաստանի Պաշտպանության նախարարությունը հայտարարել է, որ հուլիսի լույս 8-ի գիշերը հակաօդային պաշտպանության համակարգերը Ռուսաստանի շրջանների վրա խոցել են 415 ուկրաինական անօդաչու թռչող սարք։

Թարգմանությունը՝ Էմմա Չոբանյանի