02.08.2026 | 21:08
Շոգ եղանակին՝ առավել զգոնություն. ՍԱՏՄ-ի կոչը հանրային սննդի ոլորտի ներկայացուցիչներին և միջոցառումների կազմակերպիչներին
Վերաքննիչ դատարանը մեղմացրել է Մարին Լը Պենի դատավճիռը․ նա կկարողանա մասնակցել Ֆրանսիայի 2027թ․ նախագահական ընտրություններին
Քաղաքականություն
07.07.2026 | 20:13
Փարիզի վերաքննիչ դատարանն անփոփոխ է թողել ֆրանսիացի քաղաքական գործիչ Մարին Լը Պենի դատավճիռը Եվրոպական խորհրդարանի միջոցները չարաշահելու մասով, սակայն մեղմացրել է ընտրություններին նրա մասնակցելու արգելքի հետ կապված կետը, գրում է Meduza-ն։
Լը Պենը դատապարտվել էր 100,000 եվրո տուգանքի և երեք տարվա ազատազրկման, որոնցից երկուսը՝ պայմանականորեն, և պարտավորվել էլեկտրոնային թևնոց կրել։ Դատարանը նաև նրան զրկել էր ընտրովի պաշտոն զբաղեցնելու իրավունքից 45 ամսով, որոնցից 30-ը՝ պայմանականորեն։ Ընտրովի պաշտոն զբաղեցնելուց զրկվելու հետհաշվարկը սկսվել է 2025 թվականի մարտի 31-ից։
France 24-ը նշում է, թե սա նշանակում է, որ ծայրահեղ աջ առաջնորդը կկարողանա մասնակցել 2027 թվականի Ֆրանսիայի նախագահական ընտրություններին։ Նա, սակայն, պարտավոր կլինի էլեկտրոնային թևնոց կրել քարոզարշավի ընթացքում, ինչը կդժվարացնի այդ գործընթացը թե՛ քաղաքական, թե՛ ճանապարհորդության տեսանկյունից։
Դատարանի որոշումից առաջ Լը Պենը բազմիցս հայտարարել էր, որ չի ցանկանում քարոզարշավ անցկացնել էլեկտրոնային թևնոցով։ Քաղաքական գործիչը խոստացել է ավելի ուշ մեկնաբանել դատարանի որոշումը։ Ակնկալվում է, որ Լը Պենը կհայտարարի՝ մասնակցելո՞ւ է նախագահական ընտրություններին, թե՞ ոչ։
Դատարանը Եվրոպական խորհրդարանի միջոցների չարաշահման գործով վճիռը հրապարակել էր 2025 թվականի մարտին։ Այնուհետև Մարին Լը Պենին արգելվել էր հինգ տարով առաջադրվել ընտրովի պաշտոնում, ինչը փաստացի արգելում էր նրան մասնակցել 2027-ի նախագահական ընտրություններին։
Լը Պենը նախագահի պաշտոնում առաջադրվել է 2012, 2017 և 2022 թվականներին, մտադիր էր մասնակցել նաև 2027 թվականի ընտրարշավին։ Վճռի հրապարակման պահին նա նախընտրական հարցումներում ֆավորիտ էր։
Թարգմանությունը՝ Էմմա Չոբանյանի
