Էրդողանի և Թրամփի հանդիպմանը քննարկվելու են Հարավային Կովկասը և «Զանգեզուրի միջանցքը»․ Թուրքիայի փոխնախագահ

Հարավային Կովկասում ստեղծված իրավիճակը կլինի Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի հանդիպման քննարկման հիմնական թեմաներից մեկը։ Այս մասին ադրբեջանական իշխանական APA-ի թուրքական ծառայությանն ասել է Թուրքիայի փոխնախագահ Ջևդեթ Յըլմազը։

Նա նշել է, որ Թուրքիայի և  ԱՄՆ-ի նախագահների հանդիպմանը քննարկվելու է Հարավային Կովկասի իրավիճակը, ինչպես նաև տարածաշրջանային, գլոբալ և երկկողմ հարցեր։

«Հարավային Կովկասը մեծ նշանակություն ունի։ Հայաստանի և Ադրբեջանի միջև խնդիրները մեծ մասամբ լուծված են։ Մենք արդեն շատ մոտ ենք խաղաղության համաձայնագրի ստորագրմանը»,- հայտարարել է Յըլմազը։

Նա ասել է, թե օրակարգի հիմնական հարցերից մեկը, այսպես կոչված, «Զանգեզուրի միջանցքն է»։

«Զանգեզուրի միջանցքի բացումը կնպաստի Թուրքիայի և Կենտրոնական Ասիայի միջև կապերի ամրապնդմանը, ինչպես նաև Միջին միջանցքի զարգացմանը։ Բոլորս ցանկանում ենք, որ Չինաստանից մինչև Եվրոպա ձգվող այս տրանսպորտային երթուղին ավելի ամրապնդվի»,- ընդգծել է նա։

Ջևդեթ Յըլմազը հավելել է, որ Թուրքիան ակտիվ ջանքեր է գործադրում ինչպես Ադրբեջանի և Հայաստանի միջև կայուն խաղաղության, այնպես էլ Թուրքիայի և Հայաստանի միջև հարաբերությունների լիակատար կարգավորման հասնելու համար։

«Մենք և Միացյալ Նահանգներն այս հարցի վերաբերյալ նմանատիպ տեսակետներ ունենք։ Հետևաբար, Էրդողանի և Թրամփի հանդիպմանը Հարավային Կովկասի քննարկումը բնական է»,- հայտարարել է նա։

Հավելենք, որ Վաշինգտոնում օգոստոսի 8-ին ստորագրված փաստաթղթերում «Զանգեզուրի միջանցք» եզրույթ օգտագործված չէ, կողմերի միջև չկա նման պայմանավորվածություն։ Դրանցում նշվում է «Թրամփի ուղու» (TRIPP) մասին, սակայն Բաքվի քարոզչամեքենան  շարունակում է «միջանցք» եզրույթն օգտագործել՝ խեղաթյուրելով ստորագրված փաստաթղթերի բովանդակությունը։

Թարգմանությունը՝ Էմմա Չոբանյանի