28.09.2026 | 00:15
ՔՊ, 95.1%. Սուրեն Թումանյանը վերընտրվեց Թումանյանի համայնքապետի պաշտոնում. Լոռու մարզպետ
Կիևի մոտ հայտնաբերել են կնոջ մարմին, որին կասկածում էին Մոնակոյում միլիարդատեր Երմոլաևի դեմ մահափորձի մեջ
Քաղաքականություն
07.07.2026 | 13:18
Հուլիսի 6-ի երեկոյան Կիևի մոտակայքում սպանված են հայտաբերել կնոջ, որին կասկածում էին ուկրաինացի գործարար Վադիմ Երմոլաևի դեմ Մոնակոյում մահափորձ իրականացնելու մեջ։ Այս մասին հաղորդում է «Ուկրաինսկայա պրավդա»-ն՝ հղում անելով իրավապահ մարմինների աղբյուրներին, գրում է Meduza-ն։
Լրատվամիջոցի աղբյուրների համաձայն՝ կինն Ուկրաինայում չի եղել 2025 թվականի մարտի 22-ից մինչև 2026-ի հուլիսի 1-ը։
«Ուկրաինսկայա պրավդա»-ն չի նշում սպանվածի անունը, սակայն լուրին կից հրապարակվել է Անաստասիա Բերեզովսկայայի լուսանկարը, որը հետախուզվում է Ինտերպոլի կողմից մահափորձի գործով։
Աղբյուրի համաձայն՝ սպանության հետ կապված ձերբակալվել են երկու կասկածյալներ՝ Ուկրաինայի պաշտպանության նախարարության գլխավոր հետախուզական վարչության գործող սպա և իրավապահ մարմինների նախկին աշխատակից։ Նրանց անունները չեն հրապարակվում։
Հունիսի վերջին Մոնակոյում մահափորձ էր իրականացվել Դնեպրից գործարար, Forbes-ի ուկրաինական ցանկում նախկինում ընդգրկված Վադիմ Երմոլաևի դեմ։ Պայթուցիկ նյութերով պայուսակը թողել էին շենքի միջանցքում, ուր Երմոլաևը վերադառնում էր իր զուգընկերուհու և 13-ամյա որդու հետ։ Պայթյունի հետևանքով երեքն էլ վիրավորվել են, իսկ Երմոլաևի ընկերուհու (լրատվամիջոցների տեղեկությունների համաձայն՝ Աննա Նասոբինա) երկու ոտքերն անդամահատվել են։
Հուլիսի 3-ին Ինտերպոլը հետախուզում էր հայտարարել մահափորձի մեջ կասկածվողի՝ Ուկրաինայի 39-ամյա քաղաքացի Անաստասիա Բերեզովսկայայի նկատմամբ։ Հայտարարության մեջ նշվում է, որ Բերեզովսկայան խոսում է գերմաներեն, նրա վերջին հայտնի հասցեն Գերմանիայում է։ Մահափորձից հետո Բերեզովսկայան Ֆրանսիայի և Իտալիայի միջոցով փախել էր Ուկրաինա։
Թարգմանությունը՝ Էմմա Չոբանյանի
