Քաղաքականություն
07.07.2026 | 10:32
Մոսկվայի քաղաքապետ Սերգեյ Սոբյանինը հայտնել է, որ հուլիսի 6-ի երեկոյից ի վեր Մոսկվայի մարզի ուղղությամբ ավելի քան 430 ԱԹՍ է թռել, գրում է Meduza-ն։ Նրա խոսքով՝ ՀՕՊ ուժերը հեռավոր տարածություններում չեզոքացրել են անօդաչու թռչող սարքերի մեծ մասը։ Մոսկվային մոտենալիս 36 անօդաչու թռչող սարք է խոցվել։
Գիշերը Մոսկվայի բոլոր չորս օդանավակայաններում (Շերեմետևո, Դոմոդեդովո, Վնուկովո և Ժուկովսկի) թռիչքների սահմանափակումներ են մտցվել։
Ռուսաստանի Պաշտպանության նախարարությունը հայտարարել է, որ ՀՕՊ ուժերը գիշերը ՌԴ մարզերի վրա խոցել են ուկրաինական 452 անօդաչու թռչող սարք։
Հուլիսի 6-ի երեկոյան Բելգորոդի մարզի նահանգապետի պաշտոնակատար Ալեքսանդր Շուվաևը հայտնել է Ուկրաինայի զինված ուժերի կողմից տարածաշրջանի վրա հրթիռային հարձակման մասին: Նա նշել է, որ արկերի մեծ մասը խոցվել է, սակայն քաղաքացիական ենթակառուցվածքներ են վնասվել։
Շուվաևը սկզբում հայտնել է երեք զոհի մասին: Ավելի ուշ նա հայտնել է կրկնվող հրթիռային հարվածի մասին և պարզաբանել, որ առաջին հարձակման ժամանակ Բելգորոդի շրջանի Բելովսկոյե գյուղում մեկ քաղաքացիական անձ է զոհվել: Շուվաևը հավելել է, որ Բելգորոդում հարվածը հրդեհ է առաջացրել ենթակառուցվածքային օբյեկտում:
Пепел տելեգրամ ալիքի հաղորդմամբ՝ հրթիռային հարվածից հետո հրդեհ է բռնկվել Մայրուղային գազատարների գծային-արտադրական վարչությունում, ինչի հետևանքով Բելգորոդում բնակարաններում գազի մատակարարումը խափանվել է։
Կալուգայի մարզի նահանգապետ Վլադիսլավ Շապշան, իր հերթին, հայտնել է Դերժինսկի շրջանի արդյունաբերական օբյեկտում հրդեհի մասին՝ անօդաչու թռչող սարքի հարձակումից հետո: Նա ասել է, որ տուժածներ չկան, տեղում աշխատում են արտակարգ իրավիճակների արձագանքման խմբերը և ԱԻՆ անձնակազմը:
Astra-ն հաղորդում է, որ այս շրջանում են գտնվում «Первый завод» նավթավերամշակման գործարանը, նավթաբազա և մի քանի այլ խոշոր թղթի և ցելյուլոզի գործարաններ: Ըստ Exilenova+-ի՝ անօդաչու թռչող սարքերը հարձակվել են «Первый завод»-ի վրա, որի նախագծային հզորությունը տարեկան 1,2 միլիոն տոննա է:
Թարգմանությունը՝ Էմմա Չոբանյանի
