Կարևոր է, որ Հայաստանը շարունակի հարմարավետ ռեժիմ ստեղծել ռուս ներդրողների համար․Միշուստինը՝ Փաշինյանի հետ հանդիպմանը

ՌԴ վարչապետ Միխայիլ Միշուստինը «Իննոպրոմ» միջազգային արդյունաբերական ցուցահանդեսի շրջանակում հանդիպում է անցկացնում Հայաստանի վարչապետ Նիկոլ Փաշինյանի հետ, գրում է ՏԱՍՍ-ը։

Ռուսական պատվիրակության կազմում են փոխվարչապետ Ալեքսեյ Օվերչուկը, Ռոսսելխոզնադզորի ղեկավար Սերգեյ Դանկվերտը, Ռոսատոմի ղեկավար Ալեքսեյ Լիխաչովը, «Ռուսական երկաթուղիներ» ընկերության ղեկավար Օլեգ Բելոզերովը, «Ռոսպոտրեբնադզորի» ղեկավար Աննա Պոպովան, փոխարտգործնախարար Միխայիլ Գալուզինը, պետական ​​քարտուղար և ֆինանսների փոխնախարար Ալեքսեյ Սազանովը, տրանսպորտի փոխնախարար Ալեքսեյ Շիլոն, տնտեսական զարգացման փոխնախարար Վլադիմիր Իլյիչևը, էներգետիկայի առաջին փոխնախարար Պավել Սորոկինը և արդյունաբերության և առևտրի փոխնախարար Ալեքսեյ Գրուզդևը։

Ավելի վաղ Միշուստինն ու Փաշինյանը մասնակցել էին ցուցահանդեսի լիագումար նիստին՝ «Արդյունաբերական արդյունաբերություն 360» խորագրով։

Հանդիպմանը Միշուստինը նշել է Հայաստանի կողմից ռուս ներդրողների համար հարմարավետ ռեժիմ ստեղծելու կարևորությունը։ Նա նաև նշել է՝ Մոսկվան ակնկալում է, թե Հայաստանի նոր կառավարությունը, որը ձևավորվել է երկրում կայացած ընտրություններից հետո, կապահովի ռուս-հայկական հարաբերությունների առաջընթաց զարգացումը։

«Մենք հույս ունենք, որ ընտրություններից հետո ձևավորվող նոր կառավարությունը կապահովի ռուս-հայկական հարաբերությունների առաջընթաց զարգացումը՝ բարեկամության, բարիդրացիության, փոխադարձ հարգանքի և փոխադարձ շահերի հաշվառման ոգով»,- ասել է Ռուսաստանի վարչապետը։

Միշուստինը նաև ընդգծել է, որ սա Փաշինյանի առաջին արտասահմանյան այցն է Հայաստանում խորհրդարանական ընտրություններից հետո։ Նա նշել է, թե Ռուսաստանը մեծ նշանակություն է տալիս Հայաստանի հետ հումանիտար համագործակցությանը և առաջարկում է շարունակել փոխադարձ մշակութային օրերի և այլ համատեղ միջոցառումների անցկացման ավանդույթը։

«Մենք մեծ նշանակություն ենք տալիս մեր հայ գործընկերների հետ մշակութային և հումանիտար համագործակցությանը և առաջարկում ենք շարունակել մշակութային օրերի, ցուցահանդեսների և փառատոների անցկացման ավանդույթը»,- ասել է Միշուստինը։

Ռուսաստանի վարչապետը հավելել է, որ քննարկվում են նաև երիտասարդական կրթական միջոցառումները։

«Կան նաև լավ հնարավորություններ միջտարածաշրջանային ուղիղ կապերի ընդլայնման համար։ Ես պատրաստ եմ ձեզ հետ քննարկել երկկողմ հարցերի ամբողջ շրջանակը»,- ասել է ՌԴ վարչապետը՝ հայտարարելով, թե Ռուսաստանը մնում է Հայաստանի արտաքին առևտրի առաջատար գործընկերը։

Թարգմանությունը՝ Էմմա Չոբանյանի