06.11.2026 | 23:24
Նոյեմբերի 7-ին ՊԵԿ էլեկտրոնային համակարգերը երկու ժամով անհասանելի կլինեն
Ավելի քան 500 ուկրաինական ԱԹՍ-ներ հարձակվել են Ղրիմի ու ՌԴ-ի շրջանների վրա․ Ղրիմում բլեքաութ է
Քաղաքականություն
06.07.2026 | 10:48
Հուլիսի լույս 6-ի գիշերը Ռուսաստանի ՀՕՊ համակարգերը երկրի ավելի քան 20 շրջաններում, բռնակցված Ղրիմում և Ազովի ծովում որսացել ու ոչնչացրել են ուկրաինական 519 անօդաչու թռչող սարք, հայտարարել է ՌԴ ՊՆ-ն։ Թե ընդհանուր քանի ԱԹՍ-ն է գրոհել Ռուսաստանը, հայտնի չէ։ Նախարարությունը հաղորդում է միայն խոցված անօդաչու թռչող սարքերի մասին, գրում է Meduza-ն։
Յարոսլավլում ուկրաինական անօդաչու թռչող սարքերը, ենթադրաբար, հարձակվել են Յարոսլավնեֆտեօրգսինտեզ (Սլավնեֆտ-ՅԱՆՈՍ) նավթավերամշակման գործարանի վրա, հայտնում են Astra և ուկրաինական Exilenova+ տելեգրամ ալիքները։ Նրանք հղում են կատարում ականատեսների լուսանկարներին և տեսանյութերին։ Պատկերներում երևում է, թե ինչպես է ծուխը բարձրանում քաղաքի վրայով։
Յարոսլավլի իշխանությունները միայն հայտնել են, որ մարզը ենթարկվել է ուկրաինական անօդաչու թռչող սարքերի հարձակմանը: Յարոսլավլից դեպի Մոսկվա երթևեկությունը մի քանի ժամով փակվել է: Նահանգապետ Միխայիլ Եվրաևը չի հայտնել հարձակման հետևանքների մասին:
Ուկրաինական անօդաչու թռչող սարքերը նախկինում բազմիցս հարձակվել են Յարոսլավլի նավթավերամշակման գործարանի վրա, այդ թվում՝ մայիսին, նշում է Astra-ն: Սա Ռուսաստանի ամենամեծ նավթավերամշակման գործարաններից մեկն է։
Լենինգրադի մարզում, տեղական իշխանությունների նախնական տվյալների համաձայն, Լուժկիի զորավարժարանում և Ուստ-Լուգա ու Վիսոցկ նավահանգիստների մոտակայքում վնասվել են ենթակառուցվածքային կառույցներ։ Այդ կառույցների բնույթը ճշգրիտ չի նշվում։ Ոչ ոք չի տուժել։
Բռնակցված Սևաստոպոլը մնացել է առանց էլեկտրաէներգիայի՝ էներգետիկ ենթակառուցվածքների վրա հարձակման հետևանքով, հայտարարել է Ռուսաստանի կողմից նշանակված նահանգապետ Միխայիլ Ռազվոժաևը։ Պաշտոնյան զգուշացրել է, որ այսօր առավոտյան քաղաքում տրոլեյբուսներ չեն գործի։ Հանրային կոմունալ ծառայություններն անցել են պահեստային էլեկտրաէներգիայի համակարգերի։
«Կրիմէներգոն» ավելի ուշ հայտնել է, որ Ղրիմի ամբողջ տարածքում էլեկտրաէներգիայի անջատում է տեղի ունեցել։ Վերանորոգման աշխատանքներ են ընթանում։
Թարգմանությունը՝ Էմմա Չոբանյանի
