«Ուժեղ Հայաստան»-ը կվերցնի մանդատները

«Ուժեղ Հայաստան» դաշինքը կվերցնի Ազգային ժողովի մանդատները և կմասնակցի խորհրդարանի աշխատանքներին։ Այս մասին հայտարարել է դաշինքի ներկայացուցիչ Նարեկ Կարապետյանը՝ նշելով, որ այդ որոշումը կայացվել է երկու հնարավոր սցենարների քննարկումից հետո։

Կարապետյանի խոսքով՝ քննարկվել է ինչպես Ազգային ժողով չմտնելու և միայն փողոցային պայքարի տարբերակը, այնպես էլ խորհրդարանում ներկայացվածություն ունենալու տարբերակը։ Եկել են եզրակացության, որ քաղաքական փոփոխությունների համար անհրաժեշտ է համատեղել փողոցային պայքարը և խորհրդարանական ներկայությունը։

«Մենք չենք ճանաչում «Քաղաքացիական պայմանագիր» կուսակցության ներկայացվածության թվաքանակը և ներկայացվածությունը Ազգային ժողովում այս կազմով. սա ընտրախախտումների հետևանք է։

Եվ ուզում եմ մեր հայրենակիցներին վստահեցնել, որ մեր սկսած գործը մենք ավարտին ենք հասցնելու։ Մեր ճանապարհային քարտեզը պարզ է. Փաշինյանն առաջին անգամ կորցրեց ժողովրդի մեծամասնության վստահությունը, նա կորցրեց սահմանադրական մեծամասնություն ստանալու հնարավորությունը։ Մենք կսկսենք մասնակցել համայնքային ընտրություններին և կշարունակենք ընդլայնել ժողովրդի վստահությունը։ Ինչո՞ւ է պետք համայնքային ընտրություններին մեր մասնակցությունը. որովհետև այս ամբողջ պրոցեսների ժամանակ ընտրախախտումների մեջ նշանակալի դեր ունի համայնքներում «Քաղաքացիական պայմանագիր» կուսակցության տեղային ներկայացուցիչների վարքագիծը և ճնշումները։

Մենք պետք է կտրենք «Քաղաքացիական պայմանագիր» կուսակցության թևերը Հայաստանով մեկ, որպեսզի նրանք հնարավորություն չունենան ամեն գյուղում, ամեն քաղաքում ճնշման ենթարկել մեր հայրենակիցներին իրենց արդար որոշման համար»,-նշել է Կարապետյանը։

Մանրամասները՝ տեսանյութում։