Թուրքիայում հայտնի կատակերգուին կալանավորել են՝ սթենդափի ընթացքում Էրդողանին և իսլամը «վիրավորելու» համար

Թուրք կատակերգու Դենիզ Գյոքթաշը ձերբակալվել է Ստամբուլի օդանավակայանում՝ YouTube-ում սթենդափ ելույթը տեղադրելուց հետո։  32-ամյա արտիստը, ի թիվս այլ բաների, մեղադրվում է «կրոնական արժեքները հրապարակայնորեն վիրավորելու» և նախագահ Ռեջեփ Թայիփ Էրդողանին վիրավորելու համար, գրում է Euronews-ը։

«Ես կարծում եմ, որ [Ղուրանը] չորս գրքերից լավագույնն է. նախ՝ դա 7-րդ դարի համար համարձակ հայտարարություն է։ Ավելին, հեղինակը շատ դժվար ժամանակներ է ապրում. եթե նոր միտք է գալիս, ոչինչ չես կարող անել. մենք արդեն ասել ենք. «Սա վերջին գիրքն է…»»․ այս կատակը հանգեցրել է Գյոքթաշի ձերբակալությանը։

Հստակ չէ, թե նրա 90 րոպեանոց սթենդափ ելույթի ո՞ր մասն է համարվում նախագահի հանդեպ վիրավորանք, ինչը հանցագործություն է Թուրքիայի քրեական օրենսգրքի 299-րդ հոդվածով։ Սակայն նա բացահայտորեն նրան անվանել է «բռնապետ», որը վերջապես «հաշտվել է իր սեփական ցանկությունների հետ»։

Շոուն տեղադրվել է հունիսի 24-ին, այդ ժամանակից ի վեր հավաքել է գրեթե 9 միլիոն դիտում։ Այս ներկայացման մեջ Գյոքթաշը սատիրայի ժանրով վերլուծում է Թուրքիայում տեղի ունեցող քաղաքական իրադարձությունները և ծաղրում քաղաքական սպեկտրի գրեթե բոլոր ուժերին, այդ թվում՝ Էրդողանի բանտարկված մրցակից Ստամբուլի քաղաքապետ Էքրեմ Իմամօղլուին, որի ձերբակալությունն անցյալ տարի զանգվածային փողոցային բողոքի ցույցերի պատճառ էր դարձել։

Գյոքթաշի ձերբակալությունը տեղի է ունենում այն ​​ժամանակ, երբ ավելի ու ավելի շատ երաժիշտներ, արվեստագետներ, լրագրողներ և քաղաքական գործիչներ են թիրախ դառնում իշխանությունների կողմից, ովքեր համարվում են Թուրքիայի իսլամիստ-պահպանողական կառավարության կամ նրա արժեքների քննադատը:

«Դենիզ Գյոքթաշը ձերբակալվել է Ստամբուլի օդանավակայանում հուլիսի 2-ին»,- ասվում է Ստամբուլի դատախազության հայտարարության մեջ։

Նշվում է, որ ստացել են 185 բողոք շոուի վերաբերյալ, և որ այն հետաքննվում է «կրոնական արժեքներին հրապարակային վիրավորանքի համար»։

Մինչև ձերբակալությունը՝ Գյոքթաշի ելույթների կարճ հատվածներ X սոցիալական հարթակում արգելափակվել էին Թուրքիայում՝ «ազգային անվտանգության և հասարակական կարգի» նկատառումներից ելնելով։ Մի քանի օր անց դատախազները հետաքննություն են սկսել կատակերգուի դեմ՝ պնդելով, որ շոուն պարունակում է «վիրավորական դիտողություններ, որոնք հանցագործություն են համարվում»։

Գյոքթաշը, որն այդ ժամանակ արձակուրդում էր արտերկրում, ասել է, որ հինգշաբթի վերադարձել է Թուրքիա՝ գիտակցելով, որ իրեն կձերբակալեն։

Ըստ թուրքական լրատվամիջոցների՝ Անկարայում ծնված կատակերգուն սթենդափ կարիերան սկսել է Ստամբուլի TuzBiber ակումբում՝ 2019 թվականին։ Այդ ժամանակից ի վեր նա ելույթ է ունեցել Եվրոպայի և Միացյալ Նահանգների բեմերում։

Թարգմանությունը՝ Էմմա Չոբանյանի