Ֆրանսիայում անտառային հրդեհների պատճառով շուրջ 3000 մարդ է տարհանվել

Ֆրանսիայի հարավում գրեթե 3000 բնակիչ է տարհանվել անտառային զանգվածային հրդեհի պատճառով, հաղորդում է AFP-ն: Ներկայում մի քանի հրդեհներ են մոլեգնում ոչ միայն երկրի հարավում, այլև հարավ-արևմուտքում: Պատճառը շաբաթներ շարունակվող տաք և չոր եղանակն է: Վարչապետ Սեբաստիան Լըկորնյուի խոսքով՝ հրդեհները սկսվել են դրանց կանխատեսումից երկու-երեք շաբաթ շուտ, գրում է DW-ի ռուսական ծառայությունը։

Բնակիչների տարհանումը պայմանավորված է եղել Պրովանս-Ալպեր-Կոտ դ’Ազուր շրջանի Սենտ-Մարի-լա-Մեր համայնքի մոտակայքում բռնկված հրդեհով: Տարհանվածների գրեթե կեսն ապրում էր ճամբարներում. հրդեհը տասնյակ ավտոտնակներ է ոչնչացրել:

Ավելի հզոր հրդեհ է բռնկվել Օքսիտանի տարածաշրջանում գտնվող Պուզոլ-Միներվուա փոքրիկ կոմունայի  մոտ։ Այնտեղ այրվել է մոտ ինը քառակուսի կիլոմետր բուսականություն։

Մոտ 800 հրշեջ, 150 մեքենա և մի քանի հրշեջ ինքնաթիռներ աշխատում են հրդեհը մարելու ուղղությամբ։ Մինչև 70 կմ/ժ արագությամբ ուժեղ քամիները բարդացնում են կրակի դեմ պայքարը։

Հրդեհներ են բռնկվել նաև Մարսելից հյուսիս՝ Ռոնյակ և Լանսոն-Պրովանս համայնքների մոտ (երեքն էլ գտնվում են Պրովանս-Ալպեր-Կոտ դ’Ազուր տարածաշրջանում)։ Այս հրդեհները հանգեցրել են Մարսելի, Բորդոյի և Ավինյոնի միջև որոշ գնացքների չեղարկման։

Մարսելում կայացած մամուլի ասուլիսում վարչապետ Լըկորնյուն հայտարարել է, որ միայն հուլիսի 1-ին Ֆրանսիայում այրվել է 12 քառակուսի կիլոմետր տարածք։ Նրա խոսքով՝ հրդեհների սեզոնի սկզբից ի վեր բռնկվել է շուրջ 7000 օջախ, որի արդյունքում ամբողջ երկրում այրվել է 87 քառակուսի կիլոմետր տարածք։

Ֆրանսիայում ուժեղ անտառային հրդեհները հունիսյան ռեկորդային շոգի ալիքի արդյունք են, որը տևել է 11 օր։ Շատ շրջաններում օդի  ջերմաստիճանը բարձրացել էր 40°C-ից։

Météo-France-ը կանխատեսում է, որ Ֆրանսիայում ջերմաստիճանը կրկին կբարձրանա հաջորդ շաբաթ, սակայն չի սպասվում, որ այն կհասնի հունիսյան մակարդակին։ Հաշվի առնելով կանխատեսումը՝ Ներքին գործերի նախարար Լորան Նունեսը բարձր զգոնության կոչ է արել։

«Առաջիկա օրերը դժվար կլինեն»,- ընդգծել է նա։

Թարգմանությունը՝ Էմմա Չոբանյանի