05.09.2026 | 22:55
«Ինտերը» 0:2-ից հետո կամային հաղթանակ է տարել «Նապոլիի» նկատմամբ. ՏԵՍԱՆՅՈՒԹ
Վենեսուելայում երկրաշարժերի զոհերի թիվը հասել է 2295-ի․ հումանիտար ճգնաժամը խորանում է
Քաղաքականություն
02.07.2026 | 15:55
Վենեսուելայում հունիսի 24-ի երկրաշարժերից հետո հազարավոր մարդիկ գիշերում են գերբնակեցված ապաստարաններում կամ բաց երկնքի տակ։ Այս պահի դրությամբ՝ պաշտոնապես հաստատվել է 2295 մարդու մահը։ ՄԱԿ-ը գնահատում է, որ տասնյակ հազարավոր մարդիկ անհետ կորած են։ Ավելի քան 11,000 մարդ վիրավորվել է, գրում է Euronews-ը։
Նշվում է, որ արտակարգ իրավիճակը բացահայտել է Վենեսուելայում բժիշկների մշտական պակասը, որը տարիների տնտեսական ճգնաժամի, թերֆինանսավորման և զանգվածային արտագաղթի արդյունք է։ Հումանիտար կազմակերպությունների աշխատակիցները զգուշացնում են ճգնաժամի մասին, որն արագորեն հսկողության տակ չվերցնելու դեպքում առաջիկա օրերին և շաբաթներին ավելի շատ կյանքեր կխլի։
«Գլխավոր խնդիրը, որ մենք տեսնում ենք մոտ ապագայում, վարակներն են հիվանդների մոտ, որոնք բոլորից երկար են մնում աղետի գոտում։ Մենք արդեն ապրել ենք ծանր տրավմաների մի շրջան, և այն կշարունակվի, բայց հիմա վարակները իրավիճակն ավելի են բարդացնում իրավիճակը»,- ասել է մայրաքաղաք Կարակասի Hospital del Oeste հիվանդանոցի վնասվածքաբանության բաժանմունքի վարիչ Էուխենիո Կովան։
Բարեգործական կազմակերպությունները նաև զգուշացնում են, որ ենթակառուցվածքներին հասցված լուրջ վնասը կարող է հիվանդությունների բռնկումների պատճառ դառնալ ամենաշատ տուժած տարածքներում։
«Ուժեղ շոգ է, և մեծ մտահոգություն կա վարակիչ հիվանդությունների փոխանցման վերաբերյալ։ Թափոնների կառավարումը լուրջ մարտահրավեր է։ Երբ տեսնում եք ավերածությունների մասշտաբները, դրանց կառավարումը լուրջ անհանգստություն է առաջացնում »,- ասել է ՄԱԿ-ի Լատինական Ամերիկայի և Կարիբյան ավազանի մարդասիրական գործակալության խոսնակ Վերոնիկ Դյուրուն։
ԱՄՆ Հարավային հրամանատարության ղեկավար Ֆրենսիս Դոնովանի խոսքով՝ Պենտագոնը մոտ 2000 ամերիկացի զինվորականի է տեղակայել տարբեր առաքելությունների համար՝ Վենեսուելային օգնություն ցուցաբերելու նպատակով։ ԱՄՆ Պետքարտուղարության հարյուր աշխատակիցներ տեղակայվել են այս գործողություններին աջակցելու համար։
Զինվորականները վերանորոգել են Կարակասը սպասարկող գլխավոր միջազգային օդանավակայանի՝ երկրաշարժից վնասված թռիչքուղին՝ մարդասիրական օգնության ժամանումն ապահովելու համար, ափամերձ շրջաններում ռազմածովային նավեր են տեղակայել՝ ինքնաթիռով տեղափոխված փրկվածներին ընդունելու համար։ Դոնալդ Թրամփի վարչակազմը բարեգործական կազմակերպությունների և ՄԱԿ-ի միջոցով Վենեսուելային խոստացել է 300 միլիոն դոլարի օգնություն։ Սակայն սա անհրաժեշտ աջակցության միայն մի փոքր մասն է. ՄԱԿ-ի զարգացման ծրագիրը, արբանյակային պատկերների վերլուծության հիման վրա, գնահատում է, որ երկրաշարժի նյութական վնասը գերազանցում է 6,7 միլիարդ դոլարը։
Վերջին օրերին որոնողափրկարարական աշխատանքներին օգնելու համար ժամանել են ևս 50 միջազգային թիմեր, այդ թվում՝ մասնագետներ այնպիսի երկրներից, ինչպիսիք են Էկվադորը և Իսրայելը, որոնք Վենեսուելայի հետ դիվանագիտական հարաբերություններ չունեն։
Թարգմանությունը՝ Էմմա Չոբանյանի
