02.07.2026 | 15:30
Ես Ալեն Սիմոնյանն եմ ոչ պաշտոնի բերումով. ԱԺ նախագահի պաշտոնը չէ, որ ինձ հետաքրքիր է դարձրել․ ՏԵՍԱՆՅՈՒԹ
770 դրամ ելակի, 275 դրամ լոլիկի և 400 դրամ չերի լոլիկի յուրաքանչյուր կգ-ի արտահանման համար
Տնտեսություն
02.07.2026 | 14:34
Էկոնոմիկայի նախարարությունն առաջարկում է 2026 թվականի հուլիսին ևս շարունակել ջերմատնային արտադրանքի արտահանողների պետական փոխհատուցման ծրագիրը՝ միաժամանակ ընդլայնելով փոխհատուցվող ապրանքների ցանկը և փոփոխելով որոշ դրույքաչափեր։
Նախագծի հիմնավորման համաձայն՝ 2026 թվականի հունիսին Հայաստանից արտահանվել է շուրջ 784 տոննա պղպեղ, 208 տոննա լոլիկ, 109 տոննա ելակ, շուրջ 3,5 մլն հատ և 35 տոննա ծաղիկ։
Նախարարությունը նշում է, որ արտահանողները բանակցություններ են վարում նոր շուկաներ մուտք գործելու ուղղությամբ, և քանի որ գնային առաջարկները ձևավորվում են նաև պետական փոխհատուցման հաշվարկով, նպատակահարմար է ծրագիրը երկարաձգել նաև հուլիսին։ Նախագծով առաջարկվում է փոխհատուցվող ապրանքների ցանկում ներառել նաև չերի տեսակի լոլիկը, ինչպես նաև Եվրամիության անդամ երկրներ, Մեծ Բրիտանիա, Հյուսիսային Իռլանդիայի Միացյալ Թագավորություն և Շվեյցարիա արտահանվող ծաղիկների համար բարձրացնել փոխհատուցման չափը։
Եթե նախագիծն ընդունվի, ապա 2026 թվականի հուլիսին կտրամադրվի հետևյալ փոխհատուցումը. ելակ՝ 770 դրամ յուրաքանչյուր կիլոգրամի համար, լոլիկ՝ 275 դրամ յուրաքանչյուր կիլոգրամի համար, չերի լոլիկ՝ 400 դրամ յուրաքանչյուր կիլոգրամի համար, պղպեղ՝ 400 դրամ յուրաքանչյուր կիլոգրամի համար, ծաղիկ՝ 37 դրամ յուրաքանչյուր հատի համար, ԵՄ երկրներ, Մեծ Բրիտանիա, Հյուսիսային Իռլանդիայի Միացյալ Թագավորություն և Շվեյցարիա արտահանվող ծաղիկ՝ 50 դրամ յուրաքանչյուր հատի համար։
Նախարարության կանխատեսմամբ՝ հուլիսին ծրագրի շրջանակում կարտահանվի շուրջ 150 տոննա ելակ, 3900 տոննա բանջարեղեն և 5,2 մլն հատ ծաղիկ։ Նախագծով նախատեսվում է նաև, որ փոխհատուցում ստանալու համար տնտեսավարողները պետք է ներկայացնեն հայտարարագիր, որով կհաստատեն, որ արտահանվող արտադրանքը ամբողջությամբ ջերմատնային արտադրություն է։
Բացի այդ, նախագծում կնշվեն փոխհատուցվող ապրանքների ԱՏԳ ԱԱ ծածկագրերը՝ նույնականացման հնարավոր խնդիրներից խուսափելու նպատակով։ Էկոնոմիկայի նախարարության գնահատմամբ՝ որոշման ընդունումը կօգնի մեղմել ջերմատնային արտադրանքի արտահանման հետ կապված խնդիրները, նպաստել արտահանման շուկաների դիվերսիֆիկացմանը և ապահովել արտահանող կազմակերպությունների գործունեության կայունությունը։
Նարեկ Կիրակոսյան
Նկարը գեներացված է ԱԲ-ի միջոցով
