Վրաստանում Կուլևիի վերամշակման գործարանն ամբողջությամբ կհրաժարվի ռուսական նավթից

Վրաստանի արևմուտքում՝ Սև ծովի ափին գտնվող Կուլևիի նավթավերամշակման գործարանը շուտով ամբողջությամբ կդադարեցնի ռուսական նավթի վերամշակումը։ Այս մասին հայտարարել է գործարանը շահագործող Black Sea Petroleum ընկերությունը, գրում են վրացական լրատվամիջոցները։

«Այս տարվա օգոստոս-սեպտեմբերից ընկերությունը կսկսի վերամշակել միայն ոչ ռուսական ծագման հում նավթ։ Սա բարձր շահույթ ունեցող շուկաները կբացի Black Sea Petroleum-ի արտադրանքի համար»,- ասվում է օպերատորի հայտարարության մեջ։

Ընկերության տվյալներով՝ 2026 թվականի առաջին կեսին գործարանը վերամշակել է ավելի քան 650,000 տոննա հում նավթ։ 2027 թվականի առաջին եռամսյակում Black Sea Petroleum-ը նախատեսում է սկսել ներքին և միջազգային շուկաների համար ճանապարհային բիտումի, իսկ 2027 թվականի երկրորդ եռամսյակից՝ ավիացիոն վառելիքի արտադրությունը։

Միաժամանակ, Black Sea Petroleum-ը հայտարարել է ամերիկյան Honeywell արդյունաբերական կոնգլոմերատի հետ գործընկերության ընդլայնման մասին։ Ինժեներական և լիցենզավորման համաձայնագրերից բացի՝ գործընկերությունն այժմ ներառում է սարքավորումների մատակարարում և ավտոմատացված արտադրության կառավարման համակարգերի ներդրում։

2026 թվականի սկզբին Եվրամիությունը դիտարկում էր երրորդ երկրների մի քանի նավահանգիստների, այդ թվում՝ Կուլևիի տերմինալի նկատմամբ պատժամիջոցներ կիրառելու հարցը՝ ռուսական նավթի հետ կապված գործողությունների պատճառով։ Սակայն հետագայում ԵՄ-ն վրացական վերամշակման գործարանը հանել էր պատժամիջոցների նախագծից։

Կուլևիի վերամշակման գործարանը գործարկվել է 2024 թվականի վերջին։ Այն Վրաստանում իրականացված ամենամեծ արդյունաբերական նախագծերից է, որն իրականություն է դարձել պետական ​​սեփականություն հանդիսացող Վրաստանի զարգացման հիմնադրամի և «Քարթու» բանկի մասնակցությամբ, որը պատկանում է իշխող «Վրացական երազանք» կուսակցության հիմնադիր Բիձինա Իվանիշվիլիին։

Վերամշակման գործարանն առաջին հերթին նախատեսված է տարեկան մինչև 1,2 միլիոն տոննա նավթ վերամշակելու համար, որին կհաջորդի հզորությունների ընդլայնումը մինչև 4 միլիոն տոննա։ Նախագծի ընդհանուր արժեքը գնահատվում է մոտավորապես 600 միլիոն դոլար։

Թարգմանությունը՝ Էմմա Չոբանյանի