21.10.2026 | 23:30
Էրդողանն ու Ալիևը հեռախոսազրույց են ունեցել՝ Բաքվի կողմից Անկարայի նկատմամբ կոշտ քայլերի ֆոնին
ՌԴ-ն Ուկրաինայի դեմ 74 հրթիռ և շուրջ 500 ԱԹՍ է կիրառել․ Կիևում զոհերի թիվը հասել է 13-ի
Քաղաքականություն
02.07.2026 | 12:36
Ռուսական զորքերը լույս հինգշաբթի գիշերը հարձակվել են Ուկրաինայի տարածքի վրա 74 հրթիռով և 496 ԱԹՍ-ով։ Այս մասին հայտնել են Ուկրաինայի ռազմաօդային ուժերն ամենօրյա հաշվետվության մեջ, գրում է BBC-ի ռուսական ծառայությունը։
Նախնական տվյալներով՝ ժամը 9:00-ի դրությամբ՝ ՀՕՊ ուժերը խոցել կամ ճնշել են 524 թիրախ՝ 48 հրթիռ և տարբեր տեսակի 476 անօդաչու թռչող սարք։ 25 բալիստիկ հրթիռների և 12 ԱԹՍ-ների հարվածներ են գրանցվել 33 վայրերում, 18 վայրերում ընկել են անօդաչու թռչող սարքերի բեկորներ։ Մի քանի հրթիռների վերաբերյալ տեղեկատվությունը ճշտվում է։ Հարվածի հիմնական ուղղությունը Կիևն է եղել։
Իր հերթին, Ռուսաստանի պաշտպանության նախարարությունը հայտարարել է, որ հուլիսի լույս 2-ի գիշերը Ռուսաստանի հակաօդային պաշտպանությունը «որսացել և ոչնչացրել է» 327 ուկրաինական անօդաչու թռչող սարք 19 շրջաններում և բռնակցված Ղրիմում։
Կիևի վրա գիշերային զանգվածային հարձակման հետևանքով վնասներ են գրանցվել քաղաքի բոլոր թաղամասերում, հայտարարել է քաղաքապետ Վիտալի Կլիչկոն։
«Դարնիցկիի շրջանում բնակելի շենքն ամենաշատն է վնասվել։ Շենքի մի մասը բառացիորեն հողին է հավասարվել։ Այնտեղ որոնողական-փրկարարական գործողություն է ընթանում։ Նրանք փնտրում են փլատակների տակ գտնվող մարդկանց»,- հայտարարել է Կլիչկոն։
Վնասված շենքերի թվում է նաև շտապօգնության ենթակայանը, որտեղ վնասվել է նաև ինը շտապօգնության մեքենա, վեց աշխատակից, այդ թվում՝ բժիշկներ և վարորդներ, վիրավորվել են։
Իր հերթին, Ուկրաինայի վարչապետ Յուլիա Սվիրիդենկոն հայտարարել է, որ Կիևում 20 բնակելի շենքի է հարված հասցվել։
«Արտակարգ իրավիճակների պետական ծառայության փրկարարները շարունակում են աշխատել 15 վայրերում՝ մաքրելով փլատակները։ Ցավոք, փլատակների տակ դեռ կարող են մարդիկ լինել»,- հավելել է նա։
Վերջին տվյալներով՝ Կիևի վրա գիշերային հարձակման հետևանքով զոհվել է 13 մարդ, վիրավորվել՝ շուրջ 90-ը։
Հուլիսի 3-ը Կիևում հայտարարվել է սգո օր։
Թարգմանությունը՝ Էմմա Չոբանյանի
