Հանրային ներդրումային կոմիտեն հաստատել է մետրոպոլիտենի, էլեկտրական տրանսպորտի և Սևանի կեղտաջրերի կառավարման ծրագրերը

Վարչապետ Նիկոլ Փաշինյանի գլխավորությամբ տեղի ունեցած Հանրային ներդրումային կոմիտեի 8-րդ նիստում քննարկվել և հաստատվել են Երևանի մետրոպոլիտենի «Աջափնյակ» կայարանի կառուցման, մետրոպոլիտենի արդիականացման, էլեկտրական քաղաքային տրանսպորտի ներդրման և Սևանա լճի ավազանի կեղտաջրերի կառավարման ծրագրերը։ Կոմիտեն հավանություն է տվել նաև Կապսի ջրամբարի և ոռոգման ինքնահոս համակարգի կառուցման ծրագիրն ավարտին հասցնելու առաջարկին։

«Վարչապետ Նիկոլ Փաշինյանի գլխավորությամբ տեղի է ունեցել Հանրային ներդրումային կոմիտեի 8–րդ նիստը։

Օրակարգի շրջանակում ներկայացվել են «Կարեն Դեմիրճյանի անվան Երևանի մետրոպոլիտենի «Աջափնյակ» կայարանի կառուցում», «Կարեն Դեմիրճյանի անվան Երևանի մետրոպոլիտենի արդիականացում», «Էլեկտրական քաղաքային լուծումներ և շարժունակության խթանում», «Սևանա լճի ավազանի կեղտաջրերի կառավարում» հանրային ներդրումային ծրագրերի նախագծերը: Քննարկվել են նաև Կապսի ջրամբարի և ոռոգման ինքնահոս համակարգի կառուցման ծրագրի հետագա ընթացքի և հանրային ներդրումային որոշ ծրագրերի մասով բացառության կիրառման հարցերը:

«Երևանի կառուցապատման ներդրումային ԾԻԳ» ՀՈԱԿ տնօրեն Անետա Բաբայանը ներկայացրել է «Կարեն Դեմիրճյանի անվան Երևանի մետրոպոլիտենի «Աջափնյակ» կայարանի կառուցում» հանրային ներդրումային ծրագրի նախագիծը, ընդգծել, որ ծրագրի իրականացման արդյունքում կբարելավվի Երևանի բազմամոդալ տրանսպորտային համակարգը՝ արդիականացնելով և վերազինելով Երևանի մետրոպոլիտենը և ապահովելով անվտանգ շահագործում, բարձր հուսալիություն և ծառայությունների որակ։ Մանրամասներ են ներկայացվել ծրագրում ներդրումների իրականացման և կառավարման պլանի վերաբերյալ: Անդրադարձ է կատարվել ծրագրի տնտեսական կենսունակությանը, սոցիալ-տնտեսական օգուտներին և շրջակա միջավայրի վրա ազդեցությանը:

Հանրային ներդրումային կոմիտեի նիստում քննարկվել են նախագծի առանձին բաղադրիչները, դիտարկումներ են ներկայացվել ծրագրի արդյունավետ իրականացմանն ուղղված գործնական քայլերի վերաբերյալ:

Անետա Բաբայանը ներկայացրել է նաև «Կարեն Դեմիրճյանի անվան Երևանի մետրոպոլիտենի արդիականացում» հանրային ներդրումային ծրագրի նախագիծը: Ընդգծվել է, որ ծրագրի իրականացման արդյունքում կբեռնաթափվի վերգետնյա տրանսպորտը բազմամոդալ հաղորդակցության միջոցով, կզարգանա էկոլոգիապես պատասխանատու տրանսպորտը և կնվազի օդի աղտոտումը, կբարելավվի բնակիչների տրանսպորտային փորձառությունը և ծառայությունների որակը: Մանրամասներ են ներկայացվել պահանջարկի աճին զուգահեռ համակարգի արդիականացման առաջարկի վերաբերյալ:

Ծավալվել է մտքերի փոխանակություն, ընդգծվել է, որ ծրագիրը պետք է իրականացվի փուլային տարբերակով ըստ առաջնահերթությունների՝ հաշվի առնելով ներքին բովանդակային կապը:

Օրակարգի հաջորդ հարցը եղել է «Էլեկտրական քաղաքային լուծումներ և շարժունակության խթանում» հանրային ներդրումային ծրագրի նախագծի ներկայացումը: Անդրադարձ է կատարվել առկա խնդիրներին, այդ թվում՝ մեծածավալ ուղևորահոսքի սպասարկման, փոխադրողական հզորությունների անբավարարության, ծառայության որակի անկայունության, բարձր գործառնական ծախսերի, օդի աղտոտվածության բարձր մակարդակի հետ կապված խնդիրներին: Այս համատեքստում ներկայացվել է, որ նախագծի իրականացումը կնպաստի Երևանի տրանսպորտային համակարգի զարգացմանը՝ հանրային տրանսպորտի արդիականացմամբ և բարձր տարողունակությամբ, էներգաարդյունավետ շարժակազմի ներդրմամբ՝ ապահովելով անվտանգություն, հուսալիություն և որակյալ ծառայություններ։ Ընդգծվել է, որ այս նախագծով մեկնարկում է հանրային տրանսպորտը լիովին էլեկտրական շարժակազմով փոխարինելու ծրագիրը։

Քննարկման շրջանակում ընդգծվել է ուղևորահոսքի դինամիկ աճի պայմաններում շարժակազմի արդիականացման և հանրային տրանսպորտի ծառայությունների որակի բարձրացման կարևորությունն ու այդ ուղղությամբ իրականացվելիք ծրագրերը:

Օրակարգի շրջանակում Տարածքային կառավարման և ենթակառուցվածքների նախարարության ջրային կոմիտեի նախագահ Արամազդ Ղալամքարյանը ներկայացրել է «Սևանա լճի ավազանի կեղտաջրերի կառավարում» հանրային ներդրումային ծրագրի նախագիծը: Մանրամասներ են ներկայացվել կեղտաջրերի մաքրման գործող կայանների ներկա վիճակի և առաջարկվող տեխնիկական լուծման վերաբերյալ: Ընդգծվել է, որ ծրագիրը նախատեսվում է իրականացնել 3 փուլով՝ գործող կեղտաջրերի մաքրման կայանների արդիականացում և կենսաբանական մաքրման ավելացում, միջին չափի ագլոմերացիաներում նոր կեղտաջրերի մաքրման կայանների կառուցում և մեկուսացված և փոքր գյուղական համայնքների համար փոքր առանձին կեղտաջրերի մաքրման կայանների կառուցում:

Նիստում քննարկվել են ծրագրի կառավարման շրջանակի և ընթացքի հետ կապված հարցեր, անդրադարձ է կատարվել տարբեր ձևաչափերով ծրագրի իրականացման հնարավորությանը:

Վերոնշյալ նախագծերը քննարկումների արդյունքում հաստատվել են:

Արամազդ Ղալամքարյանը ներկայացրել է նաև Կապսի ջրամբարի և ոռոգման ինքնահոս համակարգի կառուցման ծրագրի հետագա ընթացքի հետ կապված հարցը: Ներկայացվել են արդեն կատարված աշխատանքները, այդ թվում՝ Ախուրյան գետի ջրի հեռացման համակարգի կառուցման, ոռոգման թունելի մուտքամասի և ելքամասի քանդման ու ամրակայման աշխատանքները, վաղ ազդարարման համակարգի տեղադրման, հնագիտական վայրերի պեղումների իրականացման, բուսաշերտի մաքրման աշխատանքները և այլն: Հաջորդիվ՝ անդրադարձ է կատարվել առկա իրավիճակին և աշխատանքների իրականացման ընթացքում առաջացած խնդիրներին, ծրագիրն ավարտին հասցնելու համար անհրաժեշտ ռեսուրսներին, ծրագրի վերափոխման և ընդլայնման պլաններին:

Հանրային ներդրումային կոմիտեն քննարկել է հարցը, հավանություն տվել ծրագիրն ավարտին հասցնելու համար ներկայացված առաջարկին։

Նիստում քննարկվել է նաև հանրային ներդրումային որոշ ծրագրերի մասով Հանրային ներդրումային կոմիտեի կարգով նախատեսված բացառության կիրառման հարցը ևս: Քննարկումների արդյունքում համաձայնություն է տրվել բացառություն կիրառմանը:

Ամփոփելով նիստը՝ վարչապետը կարևորել է ներկայացված նախագծերի հստակ պլանավորման, ռեսուրսների բաշխման, ռիսկերի կառավարման և արդյունքների գնահատման կարևորությունը»,- ասված է հաղորդագրությունում։