Ռուսաստանցիների 60%-ը կարծում է, որ տնտեսական իրավիճակը վատթարանում է․ սա վերջին 20 տարվա ընթացքում ռեկորդային ցուցանիշ է

Ամերիկյան Gallup հետազոտական ​​ընկերությունը հայտնել է, որ 2006 թվականից ի վեր առաջին անգամ Ռուսաստանի  չափահաս բնակչության մեծամասնությունը երկրում տնտեսական վիճակի վատթարացում է տեսնում։ Ընկերության տվյալներով՝ 2026 թվականի մարտից մինչև մայիս ընկած ժամանակահատվածում հարցված ռուսաստանցիների ռեկորդային՝ 60%-ն այդ մասին է հայտարարել, գրում է DW-ի ռուսական ծառայությունը։

Նախկինում նման բարձր ցուցանիշներ գրանցվել էին COVID-19 համավարակի ժամանակ՝ 2020 թվականին (45%) և 2021 թվականին (50%): Անցյալ գարնանը տնտեսական վիճակի բարելավման մասին հայտնած հարցվածների մասնաբաժինը կազմում էր կեսից ավելին՝ 27%: Հարցվածների ևս 9%-ը կարծում է, որ տնտեսական իրավիճակը մնում է նույնը։

Ըստ սոցիոլոգների՝ 2010-2016 թվականներին հարցվածների ամենաբարձր մասնաբաժինը՝ տարեկան շուրջ 40%-ը, հայտնել է, որ տնտեսական իրավիճակը ո՛չ բարելավվում է, ո՛չ էլ վատանում: Այնուամենայնիվ, վերջին տարիներին ռուսաստանցիներից միայն տասից մեկն է հայտնել կայուն տնտեսական վիճակի մասին, մինչդեռ ավելի շատ մարդիկ նշել են կա՛մ բարելավման, կա՛մ վատթարացման մասին:

Միաժամանակ, հարցման մասնակիցների 56%-ը նշել է, որ իրենց կենսամակարդակը վատանում է, ինչը նույնպես ամենաբարձր ցուցանիշն է վերջին 20 տարվա ընթացքում: Հարցվածների 29%-ը հայտնել է կենսամակարդակի բարելավման մասին: Աշխատաշուկայի իրավիճակը գնահատելիս հարցվածների 58%-ը նշել է, որ հիմա վատ ժամանակ է աշխատանք փնտրելու համար, մինչդեռ 35%-ը հակառակ կարծիքն է հայտնել: 2025 թվականին այս ցուցանիշները գրեթե հավասար էին՝ համապատասխանաբար 46% և 49%:

Ռուսների վստահությունը զինված ուժերի նկատմամբ վերջին մեկ տարվա ընթացքում նվազել է 79%-ից մինչև 66%-ի, կառավարության նկատմամբ՝ 67%-ից մինչև 53%-ի, ընտրությունների արդարության նկատմամբ՝ 56%-ից մինչև 40%-ի, իսկ Ռուսաստանում լրատվամիջոցների ազատության նկատմամբ նրանց դրական գնահատականը 59%-ից նվազել է մինչև 34%-ի։

Միաժամանակ, 2026 թվականի գարնանը Ռուսաստանի սոցհարցումների ծառայությունները գրանցել են ՌԴ նախագահ Վլադիմիր Պուտինի վարկանիշի անկում: Ապրիլի կեսերին Համառուսաստանյան հասարակական կարծիքի ուսումնասիրության կենտրոնը հաղորդել էր, որ Պուտինի վարկանիշը մարտի 30-ից ապրիլի 5-ը կազմել է 67,8%, ինչը մեկ շաբաթվա ընթացքում 2,3 տոկոսային կետով անկում է: Սա Ռուսաստանի նախագահի ամենացածր վարկանիշն է 2022 թվականին Ռուսաստանի կողմից Ուկրաինա լայնածավալ ներխուժման սկսվելուց ի վեր: Այն ավելի ցածր էր պատերազմից առաջ անցկացված վերջին հարցման ժամանակ և 2022 թվականի փետրվարի 24-ից ի վեր չէր իջել 70%-ից ցածր:

Թարգմանությունը՝ Էմմա Չոբանյանի