15.08.2026 | 21:02
Վահան Կոստանյանը Զելենսկիին է փոխանցել ՀՀ բարձրագույն ղեկավարության շնորհավորանքները
Ռուս զինվորականները Չինաստանում գաղտնի զորավարժություններ են անցկացրել․ անձամբ Պուտինն է հաստատել․ Reuters
Քաղաքականություն
01.07.2026 | 20:11
2025 թվականի վերջին Չինաստանում ռուսական զորքերի համար զորավարժություններ են անցկացվել։ Դրանք հաստատվել են Ռուսաստանի պաշտպանության նախարար Անդրեյ Բելոուսովի կողմից՝ նախագահ Վլադիմիր Պուտինի հանձնարարությամբ, հաղորդում է Reuters-ը՝ հղում անելով երկու եվրոպացի պաշտոնյաների և փակ փաստաթղթերի, գրում է Meduza-ն:
Լրագրողների կողմից ուսումնասիրված փաստաթղթերից մեկում հիշատակվում է Բելոուսովի կողմից 2025 թվականի օգոստոսին տրված ներքին հրամանը։ Դրա համաձայն՝ Ռուսաստանի զինված ուժերի պատվիրակություն է ուղարկվել Չինաստան՝ ՉԺՀ-ի բանակի օբյեկտներում անցկացվող ուսումնական միջոցառումներին մասնակցելու համար։
Հաշվետվությունը մանրամասն նկարագրում է դասընթացներից մեկը՝ ճառագայթային, քիմիական և կենսաբանական պաշտպանության երեքշաբաթյա ծրագիր, որը նոյեմբերին անցկացվել է Պեկինի ռազմական օբյեկտներից մեկում: Այն նաև ներառել է չինացի հրահանգչի լուսանկարներ, որը պարապմունքներ է անցկացնում ռուս զինծառայողների հետ: Նրանք ուսումնասիրում են միջուկային ռեակտորի մակետը և անցնում քիմիական և ճառագայթային հետախուզության, ինչպես նաև օդափոխության համակարգերի վարակումից պաշտպանության պատրաստություն։
Չինաստանը չեզոքություն է պահպանել ռուս-ուկրաինական պատերազմի ամբողջ ընթացքում։ Երկրի Արտաքին գործերի նախարարությունը լրագրողներին հայտնել է, որ Պեկինի դիրքորոշումն ուկրաինական ճգնաժամի վերաբերյալ մնում է անփոփոխ։ Գերատեսչությունը զորավարժությունների մասին ներկայացված հայտարարությունները որակել է իրականությանը լիովին չհամապատասխանող։
Reuters-ի տվյալներով՝ 2025 թվականի վերջին շուրջ 200 ռուս զինծառայողներ վերապատրաստում են անցել Չինաստանում՝ երկու երկրների միջև կնքված ոչ հրապարակային համաձայնագրի համաձայն։ Վերապատրաստումները տեղի են ունեցել Պեկինում ու Նանկինում և կենտրոնացած են եղել անօդաչու թռչող սարքերի գործողությունների, ինչպես նաև պայթուցիկների, ականների և ռադիոէլեկտրոնային պատերազմի համակարգերի օգտագործման վրա։
Չնայած չեզոքության մասին պնդումներին՝ Չինաստանը Ռուսաստանին մատակարարում է երկակի նշանակության ապրանքներ։ The Wall Street Journal-ը նշել է, որ այդ ապրանքները կարող են օգտագործվել «Շահեդ» տիպի հարձակողական անօդաչու թռչող սարքերի արտադրության մեջ։
Ավելին, 2025 թվականին Ռուսաստանը տասնապատկել է Չինաստանից օպտիկամանրաթելային մալուխի ներմուծումը։ Այս մալուխն օգտագործվում է FPV անօդաչու թռչող սարքերի կառավարման համար։
Թարգմանությունը՝ Էմմա Չոբանյանի
